«Ծառուկյան» խմբակցության պատգամավոր Նաիրա Զոհրաբյանը Ֆեյսբուքի իր էջում գրել է.

«Չկա օր, որ առնվազն մի հարյուր անգամ չասենք, որ Հայաստանը և Երևանը բնապահպանական աղետի շեմին են։ Անխնա ու վայրի հանքարդյունաբերություն, Ամուլսարի անվերջանալի էպոպեա, կանաչ տարածքների հանդեպ կատաղի վանդալիզմ։ Տպավորություն է, որ ևս մի քանի տարի ու «անտառ» և «կանաչ տարածք» հասկացությունները հավակնելու են դառնալ Գինեսի ռեկորդների շահառու։
Ու այսօր տեղեկանում ենք, որ Թեղուտ գյուղի մոտակայքում 30 մարդ ծեծի է ենթարկել ազգային պարկը հսկող երեք կամավորի։ Ինչո՞ւ։ Որովհետև այդ երեք կամավորները թույլ չեն տվել, որ հարակից գյուղերի բնակիչները կտրեն անտառն ու վաճառեն։ Գյուղացին ունի իր հիմնավորումը՝ գազ և էլեկտրաէներգիա սպառել չի կարող, որովհետև թանկ է, մնում է անտառ կտրելը։ Բայց ո՞վ է վճարելու այն գինը, երբ Հայաստանն այս կերպ վերածվում է անապատի. նույնը Երևանը, որտեղ կանաչ տարածք գտնելը այլևս դառնալու է օրվա թոփ լուրը։
Մինչդեռ, վիճակագրությունը բավականին դաժան է։ Քաղցկեղի ամենաբարձր տոկոսը Հայաստանում հենց Լոռու մարզում է, որտեղ անխղճորեն կտրում են անտառներն ու ավիրում կանաչ տարածքները։ Նույն կատաստրոֆիկ վիճակը Երևանում է։ և քանի դեռ ինչ-որ բան հնարավոր է փրկել, Երևանում պետք է կիրառել «Կանաչ քաղաքի» կոնցեպտը, ինչը և առաջարկելու է «Բարգավաճ Հայաստանը»։
Եվ որպես հետգրություն. հույս ունեմ, որ իրավապահ մարմինները պատասխանատվության կենթարկեն բոլոր նրանց, ովքեր ծեծել են երիտասարդ կամավորներին, որ ընդամենը պահպանում էին մեր բոլորի հարստությունը՝ անտառը։
Ներողություն տղաներ»։