«Մենք նստել, զրուցել ենք, սուրճ ենք խմել: Արցախի հարցի վերաբերյալ ինքը փորձել է ինձ տալ տեղեկություններ, որոնք մտածել է, որ ինձ կարող է հայտնի չլինել: Դա շատ օգտակար զրույց էր, բայց նա ինձ չի հայտնել տեղեկություններ, որոնք ինձ դեռևս հայտնի չէին: Այսինքն այն, ինչ հայտնել է, արդեն հայտնի էր ինձ»,- հրավիրած մամուլի ասուլիսում՝ անդրադառնալով ՀՀ առաջին նախագահ Լևոն Տեր-Պետրոսյանի հետ հանդիպմանն ասել է ՀՀ վարչապետ Նիկոլ Փաշինյանը: Նա նշել է, որ Լևոն Տեր-Պետրոսյանն ինքն է ցանկություն հայտնել իր հետ քննարկելու որոշ հարցեր և ինքը նրան հրավիրել է կառավարական առանձնատուն: «Առաջին նախագահը ցանկություն է ունեցել հանդիպելու: Եթե այլ ցանկություններ կլինեն հանդիպելու՝ ես կքննարկեմ»,- պատասխանելով հարցին, թե մտադիր չէ՞ հանդիպել նաև ՀՀ մյուս նախկին նախագահների հետ, ասել է Փաշինյանը: |