«Այն նման է տիեզերական քաղաքի, կարծես գիտական ֆանտաստիկայի էջերից լինի, իսկ իրականում այն սովետական թագի թանկարժեք քարերից էր»,- գրում է բրիտանական Daily Mail պարբերականը «Զվարթնոց» օդանավակայանին նվիրված իր հոդվածում: Պարբերականը նշում է, որ Երևանի «Զվարթնոց» օդանավակայանի №1 տերմինալը ողջունում էր կրեմլյան VIP-հյուրերին և ողջ ԽՍՀՄ-ից այցելուներին, սակայն այժմ այն լքված է, ապամոնտաժման շեմին է: «Այն կառուցվել է 1970-ական թթ., այդ ժամանակ այն ժամում սպասարկում էր ավելի քան 2500 ուղևորի: Այն ճոխության գագաթնակետն էր՝ կենտրոնական աշտարակում ռեստորանով, որից հիանալի տեսարան էր բացվում դեպի մայրաքաղաք Երևան»,- ասվում է հոդվածում: Այժմ, պարբերականի խոսքով, օդանավակայանի հին շենքը հիշեցնում է 1970-ականները: Թռիչքային սրահում պատերը, վնասված առաստաղը փլուզվում են, պատուհանները վնասված են կամ բացակայում են, իսկ պատերին կարելի է տեսնել սովետական դարաշրջանի գովազդային պաստառներ: Բրիտանացի ճարտարապետներն այդ առնչությամբ մտահոգություն են հայտնել և կոչ արել փրկել կլոր շենքը: Բրիտանացի հայտնի ճարտարապետ Թիմ Ֆլինի խոսքով՝ օդանավակայանը ճարտարապետության եզակի օրինակ է: Ճարտարապետը հույս է հայտնել, որ ՀՀ նոր կառավարությունը, որն իշխանության եկավ մայիսյան թավշյա հեղափոխությունից հետո, կորոշի, որ կլոր շենքը պատմական կառույց է, որը պետք է պահպանվի: Նշվում է, որ սեփականատերերը ցանկանում են այն ապամոնտաժել՝ նոր միջազգային տերմինալի ընդլայնման համար: Սակայն նրանց դեմ է Անահիտ Թարխանյանը՝ օդանավակայանի հին շենքի ճարտարապետի դուստրը: «Նա այժմ պայքարում է Երևանի քաղաքապետի պաշտոնի համար՝ շենքը փրկելու առաքելությամբ: Անահիտի հայրը՝ Արթուր Թարխանյանը, այդ շենքի կառուցման թիմի մի մասն էր»,- նշում է պարբերականը: Save Europe's heritage-ի և Լոնդոնում Pushkin House ռուսական մշակութային կետրոնի ղեկավար Քլեմ Սեսիլն, իր հերթին, ասել է, որ «Զվարթնոցն» իր տեսակով դասական է, և որ այն պետք է փրկել: «Այն կառուցվեց մի շրջանում, երբ սովետական ճարտապետները փորձարկումներ էին անում միջազգային ազդեցություններով»,- պարբերականը մեջբերում է Քլեմի խոսքը: |