Շենգավիթ վարչական շրջանի ընդհանուր իրավասության առաջին ատյանի դատարանում այսօր հետաձգվել է ծննդկան Մերի Մարգարյանի և նրա նորածնի մահվան գործով դատավարությունը` դատավոր Դավիթ Բալայանի նախագահությամբ: Այսօր դատարանում պետք է հարցաքննվեր ՀՀ ԱՆ գլխավոր մանկաբարձ-գինեկոլոգ Ռազմիկ Աբրահամյանը, սակայն վերջինը չէր ներկայացել դատական նիստին: Դատավորը տեղեկացրել է, որ Ռազմիկ Աբրահամյանը հայտնել է, որ հիվանդ է և հիվանդության պատճառով չի կարող ներկայանալ նաև հաջորդ՝ հունվարի 24-ին կայանալիք նիստին: Նշեք, որ Ռազմիկ Աբրահամյանը Մերի Մարգարյանի կոնսիլիումի անդամ է եղել, այնուհետև նախագահել է ՀՀ առողջապահության նախարարի հրամանով կազմված հանձնաժողովը, այսինքն` գնահատել է իր կողմից կատարված աշխատանքը: Հիշեցնենք, Մերի Մարգարյանը մահացել է կեսարյան հատումից հետո՝ «HELLP» սինդրոմ համախտանիշի թոքաբորբ ախտորոշմամբ, «Էրեբունի» բժշկական կենտրոնում, 2015 թվականի հուլիսի 29-ին, իսկ հաջորդ օրը մահացել է նաև վերջինիս նորածին դուստրը: «Շենգավիթ» ԲԿ-ի մանկաբարձ-գինեկոլոգ Շուշանիկ Բախշյանին և նույն բժշկական կենտրոնի բժշկուհի Անի Բաբելյանին մեղադրանք է առաջադրվել Քրեական օրենսգրքի 130-րդ հոդվածի 2-րդ մասով (բժշկական օգնություն իրականացնողը, եթե թերանում է ու անզգուշությամբ հանգեցնում հիվանդի մահվան, պատժվում է ազատազրկմամբ` 2-6 տարի ժամկետով, իսկ պաշտոն զբաղեցնելու դեպքում` ազատում պաշտոնից` առավելագույնը 3 տարի ժամկետով): Բախշյանը գրավի դիմաց ազատ է արձակվել, իսկ Բաբելյանի նկատմամբ խափանման միջոց է ընտրվել ստորագրությունը չհեռանալու մասին: |