Տարիներ առաջ ընկերուհիս ցանկանում էր ընդունվել տաքսի ծառայություններից մեկում աշխատանքի: Հրավիրում են հարցազրույցի: Հարցազրույցի ընթացքում, որն անց են կացնում երեք երիտասարդներ (ընկերության տերերը) սկսում են տարաբնույթ անձնական հարցեր տալ և ակնարկել, որ աշխատանքի վարձատրության չափը կախված է այն բանից, թե որքանով նա բարեհաճ կլինի տերերի հանդեպ: Ընկերուհիս, բնականաբար չի համաձայնում առաջարկի հետ, և, ինչպես ինքն էր նշում` երկու ոտքս առա, երկուսն էլ պարտքով վերցրի ու փախա դրանցից:

Աշխատանքի տեղավորման կայքերից մեկում` հայտարարության մեջ գրված էր, որ պահանջվում է գործավարուհի: Ես ռեզյումե ուղարկեցի, և ինձ կանչեցին հարցազրույցի: Տնօրենը պարզորեն հասկացրեց, որ իրեն սիրուհի է պետք, ասաց, որ աշխատելու եմ իր հետ, մի փոքր սենյակում, որտեղ կար երկու համակարգիչ և մեկ ընդարձակ բազմոց: «Լինելու է այնպես, որ արտաժամյա էլ աշխատես»,- ասաց տնօրենը` հասկացնելով, որ իրեն ավելի շատ սիրուհի է պետք, քան գործավարուհի: Ես էլ ասացի` հաջողություն ձեր բիզնեսին ու գնացի:

Երբեք չեմ հավատացել, որ հնարավոր է աշխատանք գտնել ռեզյումեի օգնությամբ: Վերջերս դա իմ փոխարեն արեց ամուսինս: Նա տարբեր հասցեների ուղարկեց իմ ռեզյումեն, և պատասխանը չուշացավ: Ես, իհարկե գտա աշխատանք, չնայած` չէի պատկերացնում, որ որևէ մեկը կկարդա ռեզյումես ու ինձ կհրավիրի հարցազրույցի: Բայց, ընթացքում հասկացա, որ կայքերի օգնությամբ աշխատանք փնտրելը միշտ չէ, որ իդեալական է, հնարավոր են նաև վտանգավոր դեպքեր: Իմ դեպքում եղավ նմանատիպ մի աշխատանքի առաջարկ` բավական բարձր աշխատավարձով և «հեռանկարներ» խոստացող: Առաջին հանդիպումից հասկացա, որ դա վտանգավոր է և հեռու քաշվեցի, սակայն այդ անձը սկսեց հետապնդել ինձ այն դեպքում, երբ տեղյակ էր, որ ամուսնացած եմ: Բանը հասավ նրան, որ ես ամուսնուս տեղյակ պահեցի, բացի այդ նաև տվյալ կայքի մասին ասացի ծանոթներիս, որպեսզի ավելի զգույշ լինեն:

Երբ պետք է նկարահանվեի «Մարդ Աստծո» ֆիլմում, իմ և ռեժիսորի` Առնոլդ Աղաբաբովի զրույցը սկսվեց նրանից, որ նա ասաց. «Հանվիʹր, ես պետք է տեսնեմ քո ոտքերը»: Ես պատասխանեցի. «Եթե ուզում եք նկարել գեղեցիկ մարմին, վերցրեք մոդելներ: Բայց եթե Ձեզ պետք է դերասանուհի, ես պատրաստ եմ աշխատել, և հնարավոր է` ոտքերս մի քիչ էլ ծուռ լինեն»: Շատ կոպտորեն փակեցի դուռն ու դուրս եկա: Նա 3 օր մտածելուց հետո զանգահարեց, որովհետև հասկացավ, որ ես գիտեմ` ինչ է նշանակում` լինել դերասանուհի: