Վթարի պատճառների մասին շրջանառվում են տարբեր վարկածներ, սակայն դեռևս Ռուսաստանի իրավապահ մարմինների կողմից պաշտոնական հայտարարություն արված չէ: Դիտարկվում են վարորդի անզգուշությունն ու տրանսպորտային միջոցի անսարքությունը, ինչպես նաև` արտաքին գործոնների ազդեցությունը, որոնք կարող են բերել ճանապարհատրանսպորտային պատահարի: Նշեմ, որ եղանակը եղել է պարզ, այսինքն` տեսանելիության պակասի կամ մերկասառույցի հետ կապված որևէ խնդիր չէր կարող լինել:
Տեղեկությունները, որ ղեկին նստած վարորդը կանտուզիա է ստացել, նախ պետք է պարզել, որտե՞ղ է ստացել և տվյալ պահին առողջական վիճակը կայո՞ւն է, թե՞ ոչ: Կանտուզիա ստանալը դեռ չի նշանակում, որ վարելու իրավունք չունի, եթե պատերազմի տարիներին է ստացել, իհարկե կարող է վարել: Եթե նոր է ստացել, պետք է բուժվի:

Վարկածը, թե վարորդը գերհոգնած է եղել, տիպիկ է և հավանական: Բացահայտում չէ, որ մեր վարորդները հոգնած են, մեքենաներն էլ` անսարք: Վարորդը պետք է ամսվա մեջ աշխատի որոշ ժամերի քանակ: Այսօր, բոլոր փոխադրամիջոցների պարագայում, մեր վարորդների քանակը պակաս է, որակը` նույնպես: Արդյոք վարորդը համապատասխանում է այդպիսի կարևոր փոխադրում կատարելու համար, ես խիստ կասկածում եմ, որ դա հաշվի է առնվել: Նախկինում վարորդների ընտրություն էր կատարվում, իսկ հիմա մարդը միայն ինչ-ինչ միջոցներով ձեռք բերած վարորդական իրավունքի վկայական է ներկայացնում և վերջ:

Այս ամենը գալիս է տրանսպորտային ոլորտի բարձիթողի վիճակից: Տարիներ շարունակ այն անուշադրության է մատնվել, ինչի պատճառով էլ այդ կազմակերպությունները հայտնվել են քաոսային վիճակում: Կարելի է ասել՝ նման ոլորտ գոյություն չունի: Այն ամբողջովին ազատականացրել են, ենթարկել են քաոսի` ոչ բուժզննում կա, ոչ տեխզննում, չկա լիցենզիայի պահանջ… արի պետտուրքը վճարի և ինչքան ուզում ես` վարի:

Չեմ հավատում վարկածներին, որ Գառնիկ Հարությունյանը հնարավոր է ղեկին քնած լիներ, քանի որ ընդամենը 2 ժամ էր, ինչ ճանապարհ էին ընկել։ Մանկուց մեքենա է վարում, նորմալ, ուշադիր վարորդ է, չգիտեմ՝ քննությունը կպարզի, թե ինչ է եղել, բոլորս շիվար ենք, ինքը մարդկանց կյանքի հետ խաղացող չէր:

Ուղևորա և բեռնափոխադրումների ժամանակ ճանապարհատրանսպորտային պատահարների գլխավոր պատճառներից մեկը համարվում է վարորդների կողմից աշխատանքի ու հանգստի ռեժիմները խախտելը: Եթե դիտարկենք վերջին օրերի իրադարձությունները` կապված Տուլայում վթարված հայկական ավտոբուսի հետ, ապա վարորդը քնել է ղեկին: