Սեպտեմբերի 3-ին Մոսկվայում Սերժ Սարգսյանի հայտարարությունը՝ Մաքսային միությանը ՀՀ-ի միանալու վերաբերյալ, ընդվզումների ալիք բարձրացրեց հայ հասարակության շրջանում: Բողոքի ցույցեր սկսվեցին նախագահական նստավայրի մոտ: ՙՀայաստանը Մաքսային միությանը միանալու ցանկություն չունի, մարդիկ դեմ են ՍՍՀՄ-2-ին՚,- ասում էին նրանք: Քաղաքական շրջանակներում ևս տեսակետները խիստ իրարամերժ էին: Իշխանության ներկայացուցիչների խոսքով՝ թե ռազմաքաղաքական և աշխարհաքաղաքական, թե տնտեսական առումներով Հայաստանի համար շահավետ է Մաքսային միությանը միանալը: Տնտեսագետների կարծիքով՝ սպասվում է Մաքսային միությունից ներմուծվող ապրանքների հնարավոր էժանացում, ինչպես նաև երրորդ երկրներից ներմուծվող ապրանքների հնարավոր թանկացում: