ԱՄՆ նախագահ Դոնալդ Թրամփը հայտարարել է, որ սաուդցի անհետացած լրագրող Ջամալ Խաշոգջին մահացած է: Այս մասին հաղորդում է Սպիտակ տան մամուլի ծառայությունը: «Ինձ թվում է, որ հենց այդպես է»,- լրագրողների հարցին պատասխանել է Թրամփը: «Դա շատ տխուր է»,- հավելել է նա՝ նշելով, որ ամեն դեպքում սպասում է հետաքննության վերջնական արդյունքներին՝ «ուժեղ հայտարարություն» անելու համար: Նա նաև հայտարարել է, որ մեղավորներին «լուրջ հետևանքներ են սպասվում»: The Washington Post պարբերականի սաուդցի լրագրողը, ով քննադատում էր Սաուդյան Արաբիայի իշխանությունների քաղաքականությունը, հոկտեմբերի 2-ին մեկնել էր Ստամբուլ, իր երկրի գլխավոր հյուպատոսություն, որից հետո նրա մասին տեղեկություն չէր ստացվել: Թուրքական լրատվամիջոցների համաձայն՝ Խաշոգջիին սպանել են հյուպատոսությունում: Ինչպես ավելի վաղ հայտնել էինք, Ջամալ Խաշոգջիի անհետացման սկանդալի ֆոնին՝ Սաուդյան Արաբիայում թագաժառանգ արքայազնին փոխարինող են փնտրում: |