Քաղաքական հայացքների համար հետապնդվող լրագրողները հաղթել են Time ամսագրի վարկածով «Տարվա մարդ» անվանակարգում: Այս մասին ասվում է ամսագրի կայքում: Տիտղոսին արժանացել են ողջ աշխարհում մի քանի լրագրողներ: Ցուցակը գլխավորել է սաուդցի սպանված լրագրող Ջամալ Խաշոգջին: Ամսագրի խոսքով՝ Խաշոգջիի սպանությունն այդքան արձագանք չէր ստանա, եթե չլիներ նրա անձնվեր լրագրողական աշխատանքը: «Նրա մահը մերկացրեց ժպտացող արքայազնի իրական բնույթը»,- նկատել են ամսագրի աշխատակիցները: Անցած տարի նույն անվանակարգում հաղթող էին ճանաչվել «Լռության խախտողները» միավորման ակտիվիստները, որոնց #metoo («Ես նույնպես») ֆլեշմոբն ուղղված էր սեռական բռնության դեմ: |