Հայաստանի անվտանգության խորհրդի նախկին քարտուղար Արմեն Գևորգյանի գործով դատական նիստն ավարտվեց, դատարանը հեռացավ խորհրդակցական սենյակ: Փաստաբան Էրիկ Ալեքսանյանը լրագրողների հետ զրույցում ասաց, որ դատական ակտը կհրապարակվի վաղը՝ ժամը 16:00-ին: «Արմեն Գևորգյանը հայտարարությամբ հանդես եկավ, որի բովանդակությունը չեմ կարող վերարտադրել: Նա ասաց, որ առնչություն չունի այդ մեղսագրվող արարքների հետ... Գրավի միջնորդություն ներկայացրել ենք, գրավի չափը չենք նշել, թողել ենք դատարանի հայեցողությանը»,- նշեց Ալեքսանյանը: Հիշեցնենք, որ Արմեն Գևորգյանին 3 մեղադրանք է ներկայացվել՝ առանձնապես խոշոր չափերի կաշառք ստանալու, փողերի լվացման և սահմանադրական կարգի տապլմանն օժանդակելու հոդվածներով: |