Սպիտակ տան մամուլի ծառայության հաղորդմամբ՝ երեկ ԱՄՆ նախագահ Դոնալդ Թրամփը հեռախոսազրույց է ունեցել Թուրքիայի նախագահ Ռեջեփ Էրդողանի հետ, որի ընթացքում Թուրքիային խնդրել է վատ չվերաբերվել քրդերին, փոխանցում է ТАСС-ը: «Նախագահ Թրամփը ցանկություն է հայտնել համատեղ աշխատել, որպեսզի լուծվեն Թուրքիայի մտահոգությունները՝ կապված Սիրիայի հյուսիս-արևելքում անվտանգության խնդիրների հետ: Ընդ որում նախագահն ընդգծել է, որ Թուրքիան չպետք է վատ վերաբերվի քրդերին, որոնց հետ ԱՄՆ-ն պայքարում էր ԴԱԻՇ ահաբեկչական խմբավորման դեմ»,- ասվում է ԱՄՆ նախագահի վարչակազմի հաղորդագրության մեջ: Հայտարարության մեջ նշվում է, որ ԱՄՆ զինված ուժերի շտաբերի պետերի միացյալ հանձնաժողովի ղեկավարն այսօր Սիրիայի հարցով հանդիպում կանցկացնի իր թուրք գործընկերոջ հետ: Հիշեցնենք, որ ավելի վաղ՝ երկուշաբթի օրը, ԱՄՆ նախագահը սպառնացել էր տնտեսապես ոչնչացնել Թուրքիան, եթե վերջինը որոշի հարձակում գործել Սիրիայի քրդերի վրա: Անկարան պատասխանել էր այդ սպառնալիքներին: |