«ԱԳՆ-ն հույս է հայտնում, որ հակամարտության կողմերը հանձնառու կլինեն այն պայմանավորվածություններին, որոնք ձեռք են բերվել Դուշանբեի հանդիպման ժամանակ»,- այսօր, ճեպազրույցի ժամանակ, հայտարարեց ՀՀ ԱԳՆ մամուլի խոսնակ Աննա Նաղդալյանը՝ անդրադառնալով մարտի 13-ին արցախա-ադրբեջանական շփման գծում ադրբեջանական զինուժի կողմից ականանետերի կիրառմանը:

Խոսելով Ադրբեջանում մարտի 11-15-ն անցկացված լայնամասշտաբ զորավարժությունների մասին՝ Աննա Նաղդալյանը նշեց. «Ադրբեջանի կողմից առանց համապատասխան ծանուցման հարձակողական բնույթի լայնամասշտաբ զորավարժությունների իրականացումը ԵԱՀԿ գործիքակազմով նախատեսված միջազգային պարտավորությունների խախտում է և այն որևէ ձև չի նպաստում տարածաշրջանում վստահության մթնոլորտի ամրապնդմանը: ԵԱՀԿ-ում մեր ներկայացուցչությունն այս հարցը բարձրաձայնել է ԵԱՀԿ շրջանակներում և Ադրբեջանից համապատասխան բացատրություն պահանջել: Ե՛վ Արցախը, և՛ Հայաստանն ունեն վճռականություն ու կարողություն՝ պաշտպանվելու և հակահարված հասցնելու. այս հարցը որևէ մեկը թող դա կասկածի տակ չդնի: Այդ վճռականությամբ է պայմանավորված նաև մեր հանձնառությունը՝ քայլեր ձեռնարկելու խաղաղության հաստատման ուղղությամբ»: