Մայիսի 15-ից 19-ն Անգլիայի Մանչեսթր քաղաքում կայանալիք թաեքվոնդոյի աշխարհի առաջնությանը պետք է մասնակցեր նաև Հայաստանի հավաքականը, որը, սակայն, չի կարողացել մեկնել ստուգատեսին՝ վիզաների ուշացման պատճառով։ MAMUL.am-ի թղթակցի հետ զրույցում Եվրոպայի երիտասարդական առաջնության փոխչեմպիոն, միջազգային մրցաշարերի հաղթող Ռոման Հայրապետովը նշեց, որ խորը հիասթափության մեջ է։

«Հայաստանի առաջնությունը պետք է կայանար մարտին, հետաձքվեց և կայացավ ապրիլի 2-ին, դրանից հետո հավաքականի մարզիչ էին ընտրում, մինչև ընտրեցին, ուղարկեցին վիզաների համար անհրաժեշտ փաստաթղթերը, վիզաները չհասցրեցին գալ ու չմասնակցեցինք աշխարհի առաջնությանը։ Պատկերացնո՞ւմ եք ինչ է դա։

Ես 7-8 կգ քաշ եմ գցել, մարզավիճակ եմ հավաքել ու գալիսա գնալու օրը, իմանում եմ, որ չեմ գնում։ Հոգեբանական վատ ապրումներ ունեմ, խորին հիասթափություն եմ զգում։ Իմ չարչարանքը ջուրը գնաց։ Անընդհատ նայում եմ մրցումն ընթացքում է, իսկ ես այնտեղ չեմ։ Հիմա վարկանշով շատ հետ կընկնենք։ Եթե շանս կար, որ լավագույն 32-ի մեջ կլինեինք ու Գրան պրիներին կմասնակցեինք, ապա հիմա այդ շանսը կորցրեցինք»։