Ավարտվել են Եվրոպական խորհրդարանի ընտրությունները: Ընտրություններին մասնակցության մակարդակը կտրուկ աճել է, այս մասին հաղորդում է Euronews-ը: 1979-ից մասնակցությունը նվազել էր՝ 62%-ից 2014-ին հասնելով 42.6%-ի: Այս տարի մասնակցությունը 50.5% է կազմել, որն առավելագույն գրանցված ցուցանիշն է վերջին 20 տարվա կտրվածքով: Նախնական արդյունքների համաձայն, Եվրոպայի ժողովրդական կուսակցությունը ստացել է 173 մանդատ, Սոցիալ դեմոկրատները՝ 147, Եվրոպական լիբերալները՝ 102, «Կանաչները»՝ 71: Ավանդաբար պահպանողականներն ու սոցիալիստներն են գերակշռել խորհրդարանում, բայց այս անգամ պատկերն ամբողջովին փոխվել է: Գերմանիայի «Կանաչների» կուսակցությունը կրկնապատկել է նախկինում գրանցած իր արդյունքը: Այն գերմանիայում զբաղեցրել է երկրորդ տեղը՝ Անգելա Մերկելի պահպանողականների ու սոցիալ դեմոկրատների դաշինքից հետո: Ֆրանսիայում «Կանաչների» կուսակցությունը նույնպես լավ արդյունքներ է գրանցել, նույնը տեղի է ունեցել նաև Իռլանդիայում: |