Թուրքիայի Ստամբուլ քաղաքում կիրակի միլիոնավոր մարդիկ մասնակցելու են նոր քաղաքապետի ընտրություններին, քանի որ մարտին նախագահ Էրդողանի կուսակցությունը ներկայացնող թեկնածուի պարտությունից հետո ընտրական հանձնաժողովը չեղարկել էր ընտրությունների արդյունքը, հայտնում է Ամերիկայի ձայնը: Ընտրություններում երկու գլխավոր մրցակիցները նորից Հանրապետական ժողովրդական կուսակցության 49-ամյա թեկնածու, Ստամբուլի շրջաններից մեկի նախկին քաղաքապետ Էքրեմ Իմամօղլուն է ու Էրդողանի Արդարություն և զարգացում կուսակցությունից 63-ամյա Բինալի Յիլդիրիմը։ Վերջինս Թուրքիայի նախկին վարչապետն է և Էրդողանի վաղեմի աջակիցը։ Հիշեցնենք, որ մարտի 31-ի ընտրություններում Թուրքիայի խոշորագույն այս քաղաքում հաղթել էր ընդդիմության թեկնածու Իմամօղլուն, ինչը նշանակում էր: Սա մեծ ցնցում էր նախագահ Էրդողանի համար, որը մինչ ընտրությունները մեծապես աջակցել էր իր կուսակցության թեկնածուի ընտրարշավին։ Էրդողանի կուսակցությունն այնուհետ ներկայացրել էր 15 միլիոն ազգաբնակչություն ունեցող այս քաղաքի ընտրությունները բողոքարկելու դիմումներ, և Բարձրագույն ընտրական հանձնաժողովը որոշել էր չեղարկել ընտրությունների արդյունքը, չնայած Իմամօղլուն ապրիլի 17-ին արդեն իսկ հայտարարվել էր Ստամբուլի քաղաքապետ։ Հանրապետական ժողովրդական կուսակցությունը ընտրական հանձնաժողովի այս որոշումն անվանել է բռնակալության դրսևորում։ |