«Դատախազությունը, ՀՔԾ-ն և ԱԱԾ-ն՝ բոլորը լծված են մի գործի՝ հավաքել ապացույցներ, որպեսզի Քոչարյանը գտնվի կալանքի տակ, և մեղադրանքը հիմնավորվի: Սակայն այդ դաշտում նրանք արդեն վաղուց տանուլ են տվել: Չհաջողվեց հիմնավորել թե մեղադրանքը, թե կալանքի տակ պահելու անհրաժեշտությունը: Դա է պատճառը, որ նրանք ավելի ու ավելի հաճախ սկսել են դիմել անթույլատրելի մեթոդների, գործարկել ուժային մեթոդներ, որի հնարավորությունն իրենք ունեն». հուլիսի 20-ին լրագրողների հետ հանդիպմանը հայտարարեց Ռ. Քոչարյանի պաշտպանական խմբի անդամ Հայկ Ալումյանը: Նա պնդեց, որ իրավական դաշտում պարտություն կրելն էր պատճառը, որ ուժային կառույցները ՀՀ վարչապետի հետ ձեռնարկեցին աննախադեպ ակցիա՝ փակել դատարանները՝ ահաբեկելով դատավորներին: Պաշտպանը պնդեց, որ եթե իր պաշտպանյալին կալանավորելու հիմքեր լինեին, ապա ԱԱԾ ղեկավարը ստիպված չէր լինի բացատրական աշխատանքներ տանել դատավորի հետ և հետո էլ ասել՝ կալանքը ուզես-չուզես պիտի տաս: Փաստաբանը գնահատեց, որ դատավոր Դավիթ Գրիգորյանի հետ կապված իրադարձությունները մեսիջ են բոլոր այն դատավորներին, ովքեր հետագայում կքննեն Ռ. Քոչարյանի գործը: |