Կորեայի Հանրապետության նախագահի աշխատակազմը բողոքի նոտա է հղել ռուսական կողմին, որ ռուսական զինված ուժերին պատկանող ինքնաթիռը խախտել է երկրի օդային սահմանը, այս մասին հաղորդում է Yonhap գործակալությունը:
«Մենք այս միջադեպը շատ լուրջ ենք գնահատում, եթե այն կրկնվի, ապա ավելի լուրջ միջոցներ կձեռնարկենք»,- հայտարարել է նախագահի աշխատակազմի ներկայացուցիչ Կո Մին Ջունը: Նշվում է, որ բողոքի նոտան ուղարկվել է Ռուսաստանի Դաշնության Անվտանգության խորհրդի քարտուղար Նիկոլայ Պատրուշևին:
Ավելի վաղ հարավկորեական Yonhap գործակալությունը հայտարարություն էր տարածել, որ ռուսական զինված ուժերին պատկանող ինքնաթիռը երկու անգամ խախտել է Հարավային Կորեայի օդային սահմանը՝ Ճապոնիայի ծովում գտնվող Տոկտո կղզիների տարածքում, որոնք Սեուլի ու Տոկիոյի միջև վիճահարույց թեմա են: Գործակալությունը նշում է, որ ի պատասխան դրան, հնչել են նախազգուշական կրակոցներ Կորեային պատկանող F-15 կործանիչներից: