ԱԺ «Իմ քայլը» խմբակցության քարտուղար Լիլիթ Մակունցն աղկմահարույց չի համարում Արթուր Վանեցյանի՝ ԱԱԾ պաշտոնից հեռանալը: Այդ մասին լրագրողների հետ ճեպազրույցում ասել է «Իմ քայլը» խմբակցության ղեկավարը՝ անդրադառնալով ԱԱԾ նախկին տնօրեն Արթուր Վանեցյանի հայտարարությանը, որով վերջինս պատասխանել էր Նիկոլ Փաշինյանի արած հայտարարություններին: Ըստ Լ. Մակունցի՝ ՀՀ-ում տեղի ունեցած փոփոխություններից հետո առհասարակ պետք է նորմալ վերաբերվել պաշտոնանկություններին: «Հենց այդ աղմուկն է, որ տարակուսանք է հարուցում հանրության շրջանում»,-պնդել է նա: Այն հարցին, թե նորմա՞լ է վերաբերվում այն փաստին, որ Ա. Վանեցյանի հրաժարականի տեքստը հեռացվել էր ԱԱԾ կայքից, և որտեղ նա նշել էր հրաժարականի պատճառները, Մակունցը նշեց. «Ես չեմ տեսել, թե ինչ է զետեղված եղել կայքում, չգիտեմ, թե ինչ տեքստի մասին է խոսքը, այնպես որ, թույլ տվեք չմեկնաբանել: ՀՀ-ում թե՛ կառավարությունը, թե՛ իշխող խմբակցությունը վարում են բաց քաղաքականություն, և կարծում եմ, որ եթե կա այնպիսի տեղեկատվություն, որը գաղտնիք չի պարունակում և ներկայացնում է հասարակական հետաքրքրություն, ապա պարոն Վանեցյանը պետք է հրապարակի այդ տեղեկատվությունը»: |