«Սկզբունքորեն համաձայն չեմ, որ այս հարցը հետապնդում է նպատակ ՍԴ նախագահին փոխարինել ինչ-որ մեկով: Գործընթացը հետևյալի մասին է. ՍԴ անդամներից մեկը կատարել է արարքների շարք, որը դիտարկվում է որպես կարգապահական խախտում, ինչն էլ հիմք է հանդիսանում ԱԺ կողմից ՍԴ դիմում ներկայացնելու համար». պետական-իրավական հարցերի նիստում հայտարարեց հանձնաժողովի նախագահ Վլադիմիր Վարդանյանը: Դրան հակադարձեց ԲՀԿ խմբակցության պատգամավոր Սերգեյ Բագրատյանը: «Դուք շոյելու համար չեք բարձրացրել հարցը, նպատակը բնականաբար, դատավորի փոփոխությունն է: Այլ հարց է, թե դատավորները դրան կողմ կքվեարկե՞ն, թե՞ ոչ: Պետք է իրերը կոչել իրենց անուններով»,- պնդեց Սերգեյ Բագրատյանը: Վ. Վարդանյանը կրկին նշեց, որ հարցն իրավական տիրույթում է: Հանձնաժողովի նախագահը, որ ժամանակին աշխատել է ՍԴ-ում, նկատեց, որ ՍԴ-ն ունի 2 դժբախտություն: «Մեկը՝ որ Բաղրամյան պողոտայում է, և երկրորդը՝ լուծում է ընտրությունների հետ կապված հարցերը: Այն, ինչ տեղի է ունենում Բաղրամյան փողոցի վրա, անուղղակիորեն ազդում է ՍԴ-ի վրա: Ընտրությունների հետ կապված էլ՝ 3-4 տարին մեկ դատարանի հանդեպ հասարակական վստահությունն ընկնում էր»,- ասաց Վ. Վարդանյանը: |