Ամերիկյան հանրահայտ TMZ պարբերականն անրադարձել է Քարդաշյան քույրերի՝ Հայաստան ուղևորությանը:
Հրապարակումը, մասնավորապես, մեծ ուշադրություն է հրավիրել այն փաստի վրա, որ Քիմը և Քորթնի Քարդաշյանները այցելել են Մայր Աթոռ Սուրբ Էջմիածին, որտեղ Քիմը մկրտել է իր երեխաներին` տալով նրանց հայ սրբերի անուններ: Ըստ պարբերականի՝ Քարդաշյանի կրտսեր որդուն՝ Փսալմին, մկրտության ընթացքում տվել են Վարդան անունը, Սեյնթին` Գրիգոր, իսկ Չիկագոյին` Աշխեն։ «Քիմ և Քորթնի Քարդաշյանները վերադարձան իրենց արմատներին և իրենց երեխաներին տարան իրենց հետ, որպեսզի կատարեն կրոնական արարողությունը»,- գրում է TMZ-ն:
Պարբերականը նշվում է, որ երեխաները՝ Սեյնթը, Չիկագոն, Փսալմը և Մեյսոնը (Քորթնի Քարդաշյանի որդին) հագել էին սպիտակ հագուստ, որը ընդունված է հայկական ավանդույթում՝ մկրտության ժամանակ:
Քիմ Քարդաշյանի դուստրը նախկինում մկրտվել է Երուսաղեմում՝ 2015 թվականին: Ինչ վերաբերում է Քորթնի Քարդաշյանի դստերը՝ Պենելոպեին, ով կրում էր մանուշակագույն զգեստ, պարզ չէ՝ նա մկրտվել է, թե ոչ:
LIFE.ru-ն էլ գրում է, որ մկրտությունն անցել է սովորական պայմաններում, առանց ճոխությունների ու հանդիսավորությունների, իսկ կնքահայր է դարձել եկեղեցու սարկավագներից մեկը:
Երեխաների մկրտությանն անդրադարձել է նաև հեղինակավոր DailyMail-ը՝ հրապարակելով նաև լուսանկարներ: