Mamul.am
Ամբողջական տարբերակ
USD 476.57, EUR 524.89, RUB 7.40, GBP 602.53
+11 °C, +10 °C ... +23 °C Վաղը`+23 °C
Hay / Հայ | Рус | Eng | Tür
«#WCIT 2019»-ի շրջանակներում նախարար Հակոբ Արշակյանը երկկողմ հանդիպումներ է ունեցել
21:05, 09.10.2019

Տեղեկատվական տեխնոլոգիաների համաշխարհային համաժողովի շրջանակներում (WCIT-2019) ՀՀ բարձր տեխնոլոգիական արդյունաբերության նախարար Հակոբ Արշակյանը երկկողմ հանդիպումներ է ունեցել Եթովպիայի ինովացիաների և տեխնոլոգիաների նախարար Սիսեյ Տոլա Յադեթեի, Բրազիլիայի տեխնոլոգիաների, ինովացիաների և հեռահաղորդակցության փոխնախարար Խուլիո Նետոյի, Էստոնիայի ԱԳՆ թվային հարցերով դեսպան Տոնիս Նիրկինի, Իրանի հաղորդակցության և ՏՏ նախարար Մոհամմադ Ջահրոմիի, Աֆղանստանի հեռահաղորդակցության և ՏՏ նախարար Մոհամմեդ Հաշիմի հետ: Նախարար Հակոբ Արշակյանը շնորհակալություն է հայտնել իր հրավերն ընդունելու և «WCIT 2019» համաժողովին մասնակցելու համար: Հյուրերն իրենց հերթին շնորհակալություն են հայտնել համաժողովը բարձր մակարդակով և արդյունավետ կազմակերպելու համար: Եթովպիայի ինովացիաների և տեխնոլոգիաների նախարար Սիսեյ Տոլա Յադեթեն նշել է, որ իրենց երկրում ստարտափ ընկերություններին ուղղված քաղաքականությունը լավ զարգացած չէ, և ուրախ կլինեն, որպեսզի Հայաստանը կիսվի իր փորձով և այս ուղղությամբ համագործակցությունը զարգանա: Նա նաև արձանագրել է, որ «Դիջիթեք Էքսպո»-ի շրջանակներում ստորագրվել է երկկողմ հուշագիր Եթովպիայի և «ԱրՄաթ» ինժեներական լաբորատորիաների միջև, որի համաձայն 51 «ԱրՄաթ» լաբորատորիա կներդրվի Եթովպիայի դպրոցներում: Սիսեյ Տոլա Յադեթեն նշել է, որ Եթովպիան հետաքրքրված է նաև Հայաստանի տեխնոլոգիական կրթական համակարգով: Հակոբ Արշակյանը, անդրադառնալով տեխնոլոգիական կրթության հայկական մոդելին՝ «Արմաթ»-ից մինչև «Թումո», Պոլիտեխնիկի Ազգային ինժեներական լաբորատորիաների ծրագրից մինչև ստարտափ էկոհամակարգի զարգացմանն ուղղված պետական քաղաքականություն, նշել է, որ բավական երկար ժամանակ է պահանջվել այդ մոդելը մշակելու համար և պատրաստակամություն է հայտնել այդ փորձով կիսվելու եթովպիացի գործընկերոջ հետ: Հակոբ Արշակյանն ընդգծել է նաև հայկական գիտական մեծ ներուժի առկայությունը տեխնոլոգիական ոլորտի տարբեր ուղղություններում, անդրադարձել «Ինժեներական քաղաք» ծրագրին: Բրազիլիայի տեխնոլոգիաների, ինովացիաների և հեռահաղորդակցության փոխնախարար Խուլիո Նետոյի հետ հանդիպման ընթացքում կողմերը կիսվել են իրենց առաջնահերթություններով։ Հակոբ Արշակյանը ներկայացրել է նախարարության գործունեության երեք հիմնական ուղղությունները՝ թվայնացում, ռազմարդյունաբերություն և էկոհամակարգի զարգացում։ Պայմանավորվածություն է ձեռք բերվել մի շարք ուղղություններով ընդլայնելու համագործակցությունը: Հանդիպումների ընթացքում կողմերը պայմանավորվել են բարձր տեխնոլոգիաների, կապի ոլորտներում աշխատանքային կարգով ընդլայնելու համագործակցության շրջանակները։ Էստոնիայի ԱԳՆ թվային հարցերով դեսպան Տոնիս Նիրկինի հետ հանդիպմանը նախարար Հակոբ Արշակյանը նշել է, որ Էստոնիան հրաշալի օրինակ է՝ ցույց տալու համար, թե թվային փոխակերպումները ինչպես են օգնում քաղաքացիներին խուսափելու բյուրոկրատական դրսևորումներից, ստանալ բարձրորակ ծառայություններ և այս համատեքստում կա համագործակցության մեծ շրջանակ: Տոնիս Նիրկինը հավելել է, որ տպավորված է Հայաստանի տեխնոլոգիական կրթության մակարդակով և ուրախ կլիներ, որ այս ուղղությամբ ևս համագործակցություն ծավալվեր:

Նախարար Արշակյանը պատրաստակամություն է հայտնել երկկողմ գործարարական քննարկման շրջանակերում աջակցել հայկական կրթական տեխնոլոգիաների ներդրմանը Էստոնիայում։ Արշակյանը նաև առաջարկել է Էստոնական ստարտափներին՝ օգտվել Հայստանի տեխնոլոգիական նոր միջավայրից և «Հայկական վիրտուալ կամուրջ» ծրագրի միջոցով դուրս գալ միջազգային շուկա: Իրանի հաղորդակցության և ՏՏ նախարար Մոհամմադ Ջահրոմիի հետ հանդիպման ընթացքում Հակոբ Արշակյանն ընդգծել է, որ Իրանը կարևոր գործընկեր է կապի ոլորտում համագործակցության զարգացման և ինտերնետի տրանզիտի տեսանկյունից՝ դեպի Պարսից ծոցի ավազանի երկրներ, հավելել, որ «Դիջիթեք էքսպո» ցուցահանդեսի ընթացքում շրջայցի ընթացքում այցելել է նաև իրանական ստարտափների տաղավար։ Աֆղանստանի հեռահաղորդակցության և ՏՏ նախարարի հետ հանդիպման ընթացքում քննարկվել են թվային փոխակերպումների, ինտերնետ ենթակառուցվածքների զարգացմանն ուղղված համագործակցության ուղիներ: Մոհամմեդ Հաշիմը ներկայացրել է Աֆղանստանի տեխնոլոգիական ներուժը, էկոհամակարգի, թվային տեխնոլոգիաների զարգացմանն ուղղված քայլերն ու նպատակները։

Նախարար Արշակյանն առաջարկել է ակտիվացնել համագործակցությունը ինտերնետի տարանցման ենթակառուցվածքների ուղղությամբ, որի շրջանակներում նախատեսվում է Չինաստանը և Ասիական երկրները Եվրոպային միացնող գերմայրուղու կառուցում։ Նաև քննարկվել են հայկական տեխնոլոգիական ընկերությունների արտադրանքների՝ Աֆղանստանում կիրառման, տեխնոպարկերի և ինժեներական քաղաքի ստեղծման ինչպես նաև կրթական կենտրոնների ստեղծման շուրջ։ Քննարկումները կշարունակվեն աշխատանքային կարգով։

Տեղեկացրե՛ք Ձեր մտերիմներին
| |
դեպի վեր