«Ես իմ նախորդ հայտարարության մեջ պնդել եմ, հիմա էլ պնդում եմ, որ ոստիկան Գագիկ Մկրտչյանին կրակողը Բիլյան Արմենը չէ»,- այսօր ընթացող «Սասնա ծռեր»-ի դատավարության ժամանակ մեղադրող կողմի հարցին պատասխանեց տասը անդամի գործով ամբաստանյալներից Պավլիկ Մանուկյանը: «Ես դարձյալ յուրաքանչյուր բառս պնդում եմ, դա բացարձակ ճշմարտություն է. այս փուլի համար ես առանձնապես ասելիք չունեմ: Երբ կխոսեմ մյուս վկաների հետ, այն ժամանակ իմ ասելիքը կշարունակեմ: Բայց կրկնում եմ՝ Բիլյան Արմենը չի և բանկոմատը ևս Արմեն Բիլյանը չի թալանել»,- շարունակեց Մանուկյանը: Մեղադրողի հարցին՝ առաջադրված մեղադրանքներով Ձեզ մեղավոր ճանաչո՞ւմ եք, թե՞ ոչ, Պ. Մանուկյանն արձագանքեց՝ «երբեք»: Հաջորդ հարցին՝ Ձեզ առաջադրված մեղադրանքում նկարագրված գործողությունները Ձեր կողմից կատարվե՞լ են, թե՞ ոչ, ասաց, որ այդ հարցին չի պատասխանի: Մեղադրողի մնացած հարցերին Մանուկյանը ևս չպատասխանեց: Պավլիկ Մանուկյանը դիմելով դատարանին՝ ասաց. «Ես եղել եմ արդարության մարտիկ և շատ վատ է, որ այսօր ամբողջ Հանրապետությունով մեկ տարածում են, թե Նիկոլ Փաշինյանը մեզ ազատեց: Հարց եմ տալիս` մեզ Նիկոլ Փաշինյանն ազատե՞ց, թե՞ արդարադատությունը»: Հիշեցնենք, որ Երևանի ընդհանուր իրավասության դատարանի Շենգավիթի նստավայրում ընթանում է «Սասնա ծռերի» տասն անդամի գործով դատական նիստը: |