Mamul.am
Ամբողջական տարբերակ
USD 477.46, EUR 526.02, RUB 7.42, GBP 613.63
+11 °C, +1 °C ... +12 °C Վաղը`+12 °C
Hay / Հայ | Рус | Eng | Tür
«ՀՀ ԶՈւ-ում բարձրագույն պաշտոններ զբաղեցրած անձը չի տիրապետում մայրենի լեզվին». Ա. Բաբաջանյան
22:05, 21.10.2019

ԱԺ պատգամավոր Արման Բաբաջանյանը սոցկայքի իր էջում գրել է. «Վերջին շրջանում Հայաստանում տեղի ունեցած մի շարք իրադարձություններ ցույց տվեցին, որ մենք օրենսդրական-իրավական բացեր ունենք ինչպես անվտանգության մարմինների, այնպես էլ զինված ուժերում բարձր պաշտոններ զբաղեցնող անձանց գործունեության իրավակարգավորումների առումով: Այդ օրենսդրական բացերը ի հայտ եկան մի կողմից՝ ԱԱԾ պետի պաշտոնից Արթուր Վանեցյանի ազատումից, մյուս կողմից՝ Մարտի 1-ի գործով դատավարության ընթացքում տեղ գտած խայտառակ միջադեպերից հետո, երբ պարզ դարձավ, որ Հայաստանի զինված ուժերում բարձրագույն պաշտոններ զբաղեցրած և ի պաշտոնե ահռելի փաստաթղթային բազայի հետ առնչված անձը չի տիրապետում մայրենի լեզվին:

Սրանք խնդիրներ են, որոնք ունեն առաջին հերթին օրենսդրական կարգավորումների անհրաժեշտություն:
Այդ նպատակով պատրաստվում եմ առաջիկայում Ազգային ժողովում շրջանառության մեջ դնել օրենսդրական նախագծեր` «Ազգային անվտանգության մարմինների մասին», «Ազգային անվտանգության մարմիններում ծառայության մասին», «Ոստիկանության մասին», «Ոստիկանությունում ծառայության մասին», «Զինվորական ծառայության և զինվորի կարգավիճակի մասին» ՀՀ օրենքներում փոփոխություններ կատարելու մասին: Դրանցից մեկը վերաբերելու է ԱԱԾ համակարգում բարձրաստիճան պաշտոնյաների՝ պաշտոնանկությունից հետո տեղաշարժի սահմանափակումներին, պետական պահպանության տրամադրմանը և պաշտոնանկությունից հետո առնվազն 10 տարի քաղաքական գործունեությամբ զբաղվելու արգելքին:

Մյուս օրինագծով առաջարկվելու է ներմուծել ԱԱԾ, ՊՆ և Ոստիկանության համակարգերում բարձրաստիճան պաշտոնյաների հայերենի պարտադիր իմացության ցենզ և միայն ՀՀ քաղաքացի լինելու պարտադիր պահանջ։ Նշված երկու խնդիրներին էլ մենք բախվեցինք տակավին վերջերս, երբ հայտնի դարձավ, որ Հայաստանի պաշտպանության նախարարի պաշտոնը զբաղեցրած Միքայել Հարությունյանը Ռուսաստանի Դաշնության քաղաքացի է, իսկ Մարտի 1-ի դատավարության ընթացքում մենք համոզվեցինք, որ Հայաստանի Գլխավոր շտաբի պետի պաշտոնը զբաղեցրած Յուրի Խաչատուրովը չի տիրապետում հայերեն լեզվին, այն դեպքում երբ հասանելիություն է ունեցել գերգաղտնի փաստաթղթերի, որոնք փաստորեն ի վիճակի չի եղել անգամ կարդալ:

Նշված երկու օրինագծերի ամբողջացման նպատակով ներկայումս զբաղվում եմ այս ոլորտների իրավակարգավորումների միջազգային փորձով: Ուրախ կլինեմ լսելու նշված օրինագծերի վերաբերյալ փորձագիտական, մասնագիտական կարծիքներ, որոնք անպայմանորեն հաշվի կառնվեն օրինագծերի վերջնական տեքստում: Տեղեկացնեմ նաև, որ երկու օրինագծերի վերաբերյալ քննարկումներ ենք ծավալել ԱԺ «Իմ քայլը» խմբակցության պատգամավոր Սիսակ Գաբրիելյանի հետ և հնարավոր է նախագծերը ներկայացնենք համատեղ հեղինակմամբ»:

Տեղեկացրե՛ք Ձեր մտերիմներին
| |
դեպի վեր