Վերջին օրերին Հայաստանում ամենաքննարկվող թեմաներից մեկը ՀՀ արտաքին գործերի նախարար Զոհրաբ Մնացականյանի հարցազրույցն է BBC-ի Hard Talk հաղորդմանը։ Հարցազրույցը լուրջ քննադատություն և զայրույթ է առաջացրել ՀՀ իշխանական, ոչ իշխանական և քաղաքացիական հասարակության շրջանում։ Ասում են՝ իշխանությունը զայրացած է հատկապես այն հանգամանքից, որ Մնացականյանը ոչ միայն չի կարողացել հիմնավորել վարչապետ Նիկոլ Փաշինյանի հնչեցրած մոտեցումները, այլև ամրապնդել է Հայաստանի հակառակորդ կողմի դիրքերը միջազգային ասպարեզում։ Ասում են նաև, որ իշխող ուժին զայրացրել է հատկապես այն հանգամանքը, որ արտգործնախարարը որևէ կերպ չի հակադարձել զրուցավարի այն պնդումներին, թե «Արցախն ադրբեջանական տարածք է․․․», «հայկական զորքերը ռազմական հանցագործություններ են կատարել․․.» և նմանատիպ հայտարարություններին։