Հրապարակախոս Կարպիս Փաշոյանը ֆեյսբուքյան իր էջում գրել է. ««Համալսարաններում հայերենի պարտադիր դասավանդումը կարևոր է առաջին հերթին հայապահպանության տեսանկյունից»։ Սա վերջին օրերի, թերևս, ամենից հաճախ արտաբերվող մտքերից մեկն է, որն, իմ համոզմամբ, պարզունակ տավտոլոգիա է։
Մենք պետք է հստակ ամրագրենք, որ Հայաստանի Հանրապետության տարածքում հայապահպանության խնդիր չկա և չի էլ կարող լինել, քանի որ պետության գոյությունն ինքնին բոլոր արժեքների պահպանման գրավականն է։ Պարզապես անլուրջ է զբաղվել հայապահպանությամբ մի տարածքում, որտեղ հայերը ճնշող և ագրեսիվ մեծամասնություն են։ Ագրեսիվ, իհարկե, մշակութային տեսանկյունից, քանի այն դոմինանտ է, կլանող և անընդհատ տարածվող։
Այս պարզ բաները մենք չենք կարողանում հասկանալ, ինչի հետևանքով էլ հայտնվում ենք տավտոլոգիայի զավեշտալի տիրույթում։
Հայապահպանությամբ պետք է զբաղվել Մերձավոր Արևելքում, ԱՄՆ-ում, Եվրոպայում, բայց ոչ երբեք՝ Հայաստանի տարածքում։
Իհարկե, նեոֆաշիստական հայացքներ ունեցող ընդդիմախոսները կարող են բերել այն հակափաստարկը, իբրև թե իր բուն տարածքում հանրությունը ենթարկվում է փոփոխման։ Սա արդեն տավտոլոգիա չէ, այլ՝ պարզունակ դեմագոգիա, քանի որ առնվազն ծիծաղելի է պայքարել սոցիումի/ազգի բնականոն ընթացքի և զարգացման դեմ»: