Հանրային խորհրդի անդամ Բաբկեն Պիպոյանը դիմում է ներկայացրել Կառավարություն՝ ՀՀ վարչապետին խնդրելով դադարեցնել խորհրդում իր գործունեությունը: Հիշեցնենք, որ «Իրազեկ և պաշտպանված սպառող» ՀԿ-ի նախագահ Բաբկեն Պիպոյանը Հանրային խորհրդի երեկվա նիստի ժամանակ հայտարարել էր, որ հեռանում է խորհրդից։ «Հանրային խորհուրդը լքում եմ, քանի որ չպետք է խնդրեմ, որ իմ խորհուրդը լսեն»,- այսօր Հանրային հեռուստաընկերության եթերում ասել է Բ. Պիպոյանը: Նրա խոսքով` Հանրային խորհուրդը պետք է դառնար պրոֆեսիոնալ փորձաքննություն անող մարմին, որտեղ հնչեցված կամայական կարծիքը պարտադիր բխելու էր ՀՀ-ի շահերից: «Գործադիրն ուզում է խորհուրդ լսել, բայց ի՞նչ խորհուրդ, ումի՞ց է ուզում լսել, ումից` ոչ: Ես ինչո՞ւ եմ շատ հեշտ արել այս քայլը, որովհետև ես շարունակել ու շարունակում եմ հանրային գործունեությունս...: Ես դուրս եմ գալիս Հանրային խորհրդից` ապացուցելու համար, որ ինձ պետք չէ, որ ես այնտեղ լինեմ. այն պետք է երկրին»,- եթերի ընթացքում ասել է Պիպոյանը: Առավել մանրամասն` տեսանյութում: |