Սահմանադրական փոփոխությունների վերաբերյալ քվեարկության տապալումից հետո (ընտրությունները համամասնական ընտրակարգով անցկացնելու մասին) բողոքի ակցիայի մասնակիցներն ամբողջ գիշեր անցկացրել են Վրաստանի խորհրդարանի շենքի հարևանությամբ գտնվող Ռուսթավելի պողոտայում տեղադրված վրաններում: Այս մասին հայտնում է Վրաստանի հանրային հեռուստաընկերությունը: «Մեր նպատակն է ուժեղացնել ցույցերը, քանի դեռ այս երկիրը հնարավորություն չունի անցկացնել պատշաճ ընտրություններ: Ռուսթավելին և այլ պողոտաներ երկար ժամանակով կփակվեն: Կլինեն ավելի շատ վրաններ, բողոքի ակցիան ավելի ակտիվ կլինի»,- հայտարարել է ցուցարարներից մեկը: Առավոտյան անհայտ անձինք վրանների մոտ են բերել կարմիր վարդեր՝ ի նշան «Վարդերի հեղափոխության», որը տեղի ունեցավ Վրաստանում 2003-ի նոյեմբերին և հնարավորություն տվեց իշխանության գալ Միխաիլ Սաակաշվիլիին ու նրա կուսակցությանը: Բացի Թբիլիսիից, բազմամարդ ցույցեր են ընթանում նաև Բաթումի քաղաքում. «Ազգային շարժում» կուսակցության անդամները շրջափակել են տեղական ինքնակառավարման մարմնի շենքը, պահանջում են ղեկավարի հրաժարականը: |