«Լիարժեք արձագանքի համար պետք է ավելի խորությամբ ծանոթանամ, հպանցիկ եմ լսել, այդ առումով ձեռնպահ կմնամ՝ մեկնաբանելու իր խոսքերը: Կարծում եմ՝ ավելի ճիշտ կլինի Զ. Մնացականյանի խոսնակն արձագանքի այդ հարցազրույցին»,- դեկտեմբերի 13-ին լրագրողների հետ ճեպազրույցում ասաց ՀՀ վարչապետի խոսնակ Վլադիմիր Կարապետյանը՝ լրագրողների՝ Ադրբեջանի ԱԳ նախարար Էլմար Մամեդյարովի հայտարարությունը մեկնաբանելու խնդրանքին ի պատասխան: Հիշեցնենք, որ Ադրբեջանի ԱԳ նախարար Էլմար Մամեդյարովն ադրբեջանական CBC հեռուստաալիքին տված հարցազրույցում ասել է, թե բանակցությունների ընթացքում հայկական կողմը տարբեր փաստաթղթեր է առաջ քաշել, որոնցից վերջինը «Լավրովի պլանն» էր: «Կա ԵԱՀԿ ՄԽ համանախագահների 2019-ի մարտի 9-ի հայտարարությունը, որտեղ ներկայացված է միջնորդների տեսլականը բանակցություններում առաջ շարժվելու վերաբերյալ: Էությունը շատ պարզ է՝ փուլայնություն: Առաջին փուլում դուրս են բերվում զորքերը, ադրբեջանական բնակչությունը վերադառնում է, դրան հաջորդում է անվտանգության ապահովումն ու կոմունիկացիաների կարգավորումը: Ուստի մեր առաջարկը հայկական կողմին կարելի է բնութագրել որպես «խաղաղություն բարգավաճման հեռանկարով»,- ասել է ադրբեջանցի նախարարը: |