Դերասանուհի Թամար Հովհաննիսյանը «Ֆեյսբուք»-ի իր էջում գրել է. «Ուրեմն` Էրեբունի վարչական շրջանի ղեկավարի, տեղակալների, աշխատակազմի կարծիքով, այս հանճարեղ արձանի շրջակայքում թույլատրելի և անպատիժ կերպով կարելի է տեղադրել որևէ բան, նույնիսկ աշխարհի ամենաճաշակով տոնածառը: Հենց տեղադրած օրը պետք էր հանել ու տանել իրենցից մեկի... տանը դնել, որ հասկանային, որ արվեստի հանճարեղ գործերն իրենց միջավայրն են պարտադրում, նույնիսկ թաղապետին, քաղաքապետին, քաղաքի գլխավոր ճարտարապետին, վարչապետին և ուզածդ պետին: Քանի հին տարում ենք, փրկեք Սասունցի Դավթին, խնդրում եմ... Ինչպես զորավար Անդրանիկն է մի խնջույքի ժամանակ ասում Հովհաննես Թումանյանին, թե՝ կգա ժամանակ, ոչ ես կմնամ, ոչ էլ դու, բայց «Շունն ու Կատուն» հավերժ կապրի: Կգա ժամանակ, որ մեզնից ոչ ոք չի լինի, բայց այս արձանը հավերժ կլինի, միլիոն նոր տարիներ կտեսնի»: