Նավթի համաշխարհային պահանջարկը կհասնի իր գագաթնակետին 2041 թվականին: Այս մասին նշված է Արժույթի միջազգային հիմնադրամի (ԱՄՀ) զեկույցում: Պահանջարկը կկազմի օրական մոտ 115 միլիոն բարել, մինչդեռ ներկայում այն մոտ 100 միլիոն բարել է: ԱՄՀ-ն կանխատեսում է, որ հետագա աճն էներգիայի սպառման արդյունավետության բարձրացմամբ պայմանավորված չի լինի: Ըստ զեկույցի՝ պահանջարկի նվազումն ամենից շատ կանդրադառնա նավթ արտահանող երկրների, մասնավորապես՝ Սաուդյան Արաբիայի, Քաթարի, ԱՄԷ-ի, Բահրեյնի, Քուվեյթի և Օմանի վրա: Այս երկրները կարող են մինչև 2034 թվականը ծախսել իրենց խնայած երկու տրիլիոն դոլարը, քանի որ երկրների տնտեսությունները հիմնականում կենտրոնացած են ածխաջրածինների արտահանման վրա, որի հասույթը մինչև 2050 թվականը կնվազի 23-ից 10 տոկոս ՀՆԱ-ի համեմատությամբ: ԱՄՀ-ն արաբական երկրներին խորհուրդ է տալիս պահպանել խնայողական քաղաքականությունը, ձեռնարկել լայնածավալ տնտեսական բարեփոխումներ և դիվերսիֆիկացնել տնտեսությունը: