+12 °C, +12 °C ... +27 °C Վաղը`+26 °C
ՀՀ վերաքննիչ քրեական դատարանը փետրվարի 18-ին բավարարել է Ռոբերտ Քոչարյանի և մյուսների գործով մեղադրյալ Արմեն Գևորգյանի պաշտպան Էրիկ Ալեքսանյանի միջնորդությունը: Այդ մասին լրագրողներին հայտնեց ինքը՝ պաշտպանը: Ըստ նրա՝ 2019թ. հունիսին Երևանի ընդհանուր իրավասության դատարանը, ի դեմս դատավոր Դավիթ Գրիգորյանի, գրությամբ թույլատրել էր Ա. Գևորգյանին մեկնել ՀՀ-ից: Սակայն հետո օդանավակայանում ոստիկանության աշխատողները չեն թույլատրել մեկնել՝ դա հիմնավորելով նրանով, որ առկա չէ դատարանի պատշաճ որոշում: «Այդ ժամանակ մենք ասացինք, որ այս փաստաթուղթը չունի «որոշում» վերտառությունը, այն գրություն է, բայց բովանդակային առումով որոշում է»,- նշեց Է. Ալեքսանյանը: Դրանից հետո պաշտպանը Ա. Գևորգյանին ՀՀ սահմանը հատելը չթույլատրելու կապակցությամբ հաղորդում էր ներկայացրել ՀՀ գլխավոր դատախազին, որով խնդրել էր իրավական գնահատականի արժանացնել ՀՀ ոստիկանության քրեական հետախուզության գլխավոր վարչության գործողությունները, իսկ քրեական գործ հարուցելու առիթի օրինականության և հիմքերի բավարար լինելու դեպքում՝ հարուցել քրեական գործ: Սակայն ՀՀ գլխավոր դատախազությունը, հետո նաև առաջին ատյանի դատարանը գտել էր, որ ներկայացված հաղորդումը վերացական է և չի պարունակում կոնկրետ տվյալներ հանցագործության հատկանիշների մասին: Դրան հաջորդել է հայցի ներկայացումը՝ Երևանի ընդհանուր իրավասության դատարան՝ անգործության հիմքով: Հայցը մերժվում է նույնատիպ հիմնավորմամբ: Պաշտպանն առաջին ատյանի որոշումը բողոքարկում է Վերաքննիչ դատարան: «Վերաքննիչը, բեկանելով առաջին ատյանի որոշումը, արձանագրեց, որ տեղի է ունեցել Ա. Գևորգյանի իրավունքների խախտում և վարույթն իրականացնող մարմնին պարտավորեցրեց այդ իրավունքների խախտումը վերացնել, այսինքն՝ նախապատրաստել նյութեր՝ պարզելու, թե տվյալ պաշտոնյաների գործողություններում հանցակազմ կա՞, թե՞ ոչ»,-պարզաբանեց Է. Ալեքսանյանը: |
ՄԱՄՈՒԼ.ամ - Նորություններ Հայաստանից, Արցախից (Լեռնային Ղարաբաղ) և աշխարհից
Նյութերի հրապարակումն առանց խմբագրության գրավոր թույլտվության արգելվում է:
Կայքի նյութերի մասնակի/ամբողջական հեռուստառադիոընթերցումն առանց ՄԱՄՈՒԼ.ամ-ին հղման արգելվում է:
Գովազդների բովանդակության համար կայքը պատասխանատվություն չի կրում:
Հասցե` Հայաստանի Հանրապետություն, ք. Երևան, Չարենցի 1:
Հեռ.` +374 (10) 55-20-59
Էլ. փոստ` info@mamul.am
Հեռ.` +374 (91) 99-22-02
Էլ. փոստ` marketing@mamul.am