Հայաստան մարզական հասարակական կազմակերպության Հեծանվի մարզադպրոցի աշխատողները բողոքի ակցիա են իրականացնում Երևանի քաղաքապետարանի դիմաց: Նրանք քաղաքապետի հետ հանդիպում են պահանջում՝ ներկայացնելու համար իրենց հուզող հարցերը: «Մենք այդ բազայի համար ցավացողներն ենք: Մի տարի է՝ ուզում ենք հանդիպենք, չի ստացվել: Հիմա եկել ենք խնդրենք, որ մեզ ընդունի: Երեք հարց ունենք քննարկելու, որը վերաբերում է մեր հետագա ճակատագրին: Խնդրում ենք մեր պատմությանը ծանոթանա, իսկ մենք կսպասենք, թող քննարկեն՝ մեզ պատասխանեն»,- հայտարարեց Երևանի հեծանվահրապարակի փոխտնօրեն Ալբերտ Պետրոսյանը՝ հավելելով, որ այլևս սպասելու ժամանակ չունեն: Ա. Պետրոսյանը նշեց, որ կցանկանային հենց քաղաքապետին հանդիպել, որովհետև նրա խոսքով՝ «այն, ինչ խնդրում ենք՝ ուղիղ իր տիրույթում է գտնվում»: Նշենք, որ այս պահին հեծանվահրապարակի տնօրենը հանդիպում է քաղաքապետարանի ներկայացուցչի հետ: |