ԱԺ պատգամավոր Արման Բաբաջանյանը ֆեյսբուքյան իր էջում գրել է. «Պաշտոնական այցով Երևանում է գտնվում Վրաստանի պաշտպանության նախարար Իրակլի Ղարիբաշվիլին։ Նա, ի դեպ, ժամանակին զբաղեցնելով Վրաստանի վարչապետի պաշտոնը, այդ կարգավիճակում արդեն եղել է Հայաստանում։ Իսկ պաշտպանության նախարարի պաշտոնում նշանակվելուց հետո տարածաշրջանային երկրներից Ղարիբաշվիլին առաջինը ժամանել է Հայաստան, ինչն ունի մի կողմից՝ խորհրդանշական, մյուս կողմից՝ քաղաքական նշանակություն։ Որպես կանոն՝ թուրք-ռուսական հակադրություններն այլ տարածաշրջաններում տարբեր դրսևորումներով իրենց արտահայտությունն են գտնում Հարավային Կովկասում, ինչը Հայաստանին և Վրաստանին ստիպում է լինել մշտապես զգոն և պատրաստ իրադարձությունների ցանկացած զարգացման։ Նաև այս իրողությունը մեր երկու երկրներին դարձնում է բնական դաշնակիցներ այս տարածաշրջանում։ Իսկ տարածաշրջանային զարգացումների վերջին շրջանի համատեքստը վկայում է հայ-վրացական ռազմական հարաբերությունների սերտացման ավելի մեծ պոտենցիալի մասին։ Խոսքը վերաբերում է վերջին շրջանում Ադրբեջանի ու Վրաստանի միջև մի շարք հարցերում նկատվող լարվածությանը, ինչն օբյեկտիվորեն Վրաստանին ավելի է մոտեցնում Հայաստանին։ Այս իրադարձությունների միջև կորելացիան, իհարկե, ուղիղ չէ, սակայն ներկայումս այդ առումով Հայաստանի համար ստեղծվել են լավ հնարավորություններ։ Վերը նշված բոլոր գործոնները Վրաստանի պաշտպանության նախարարի Երևան կատարած այցին առանձնակի կարևորություն են հաղորդում։ Հայ-վրացական հարաբերություններն ընդհանրապես, երկու երկրների միջև ռազմական համագործակցությունը՝ մասնավորապես, կենսական անվտանգային նշանակություն ունեն ինչպես Հայաստանի, այնպես էլ Վրաստանի համար։ Դրանց դինամիկ զարգացումը բխում է մեր երկրների ռազմավարական շահերից և հանդիսանում է տարածաշրջանի կայունության կարևոր երաշխիքներից մեկը»: |