ՁԻԱՀ-ի կենտրոնի աշխատանքից ազատման դիմում գրած աշխատակիցները ֆեյսբուքյան էջում տեղեկացնում են. «Արդարությունը և ողջամտությունը վերականգնելու ճանապարհին. Արդեն մեկ ամիս է, ինչ ՁԻԱՀ֊-ի կանխարգելման հանրապետական կենտրոնի աշխատակիցները սեփական դիմումների համաձայն ազատված են աշխատանքից: Աշխատանքից ազատման դիմումները ՁԻԱՀ-ի կենտրոնը «Նորք» ինֆեկցիոն կլինիկական հիվանդանոցին միացնելու անհիմն որոշման հնարավոր հետևանքներին որոշման հեղինակների ուշադրությունը հրավիրելուն, մեկ տարի չլսված ձայնը լսելի դարձնելուն ուղղված հարկադրված քայլ էր: Մասնագիտական և մարդկային տեսանկյունից չափազանց ծանր այդ քայլին դիմեցինք՝ չցանկանալով դառնալ նշված որոշման իրագործման անցանկալի հետևանքների կրողը: Առ այսօր որևէ արձագանք երկրի առողջապահական համակարգում աննախադեպ այս երևույթին չկա: Այնուհանդերձ, վստահ ենք, որ ի վերջո մեր ձայնը տեղ կհասնի և արդարությունը կվերականգնվի։ ՁԻԱՀ֊ի կենտրոնը «Նորք» ինֆեկցիոն հիվանդանոցին միացնելու իրական նպատակներին և գործընթացի հիմնական դերակատարներին կանդրադառնանք ավելի ուշ։ Իսկ այս պահին օգտագործում ենք յուրաքանչյուր հնարավորություն՝ ծառայեցնելու մեր գիտելիքները, հմտություններն ու ջանքերը հանրային առողջության սպառնալիքի՝ կորոնավիրուսային վարակի դեմ պայքարին և այդ մարտահրավերի հաղթահարմանը։ Պահպանեք ձեր և ձեր մտերիմների առողջությունը»: |