ԱԺ «Լուսավոր Հայաստան» խմբակցության պատգամավոր Արմեն Եղիազարյանը ֆեյսբուքյան էջում գրել է. «Եվ այսպես, մեծամտորեն խոսում է մի ոլորտի նախարար, որը ձախողել է համավարակի կանխարգելման ամբողջ գործընթացը։ Այդ նախարարն իր փնթի և անպատասխանատու կառավարման արդյունքում ապահովեց վարակակիրների թռիչքային աճ... Թույլ տվեց հաջողություններ գրանցած հարևան երկրի նկատմամբ այնպիսի արտահայտություններ, որոնց համար հետագայում ներողություն խնդրեց։ Չլսեց և չընդունեց ոչ ոքի խորհուրդներն ու օգնության առաջարկները՝ իրեն համարելով ամենագետ և ամենազոր։ Ավելին չէր էլ կարելի սպասել մի անձնավորությունից, ով իրեն թույլ է տվել երեխաների համար «փոքրիկ դագաղների շահավետ բիզնես» արտահայտությունը: Դուք իրավունք չունեք նման կերպ խոսելու, դուք ուղղակիորեն պատասխանատվություն եք կրում երկրում տիրող համավարակի քաոսային վիճակի համար, դուք պատասխանատու եք բոլոր վարակակիրների, հիվանդների և մահացածների համար։ Ուժ և համարձակություն գտեք առերեսվելու իրականության հետ, դուք իրավիճակը մոտեցրել եք անդունդին, ՍԹԱՓՎԵ՛Ք»: |