Պատմաբան Ռուբեն Շուխյանը ֆեյսբուքյան իր էջում գրել է. «Մայր Հայաստան, թե... Այս հուշարձանը համարվում է Գյումրիի խորհրդանիշը, կանգնեցվել է 1975-ին, բայց արդյոք այսօր այն իր իմաստային նշանակությամբ համապատասխանում է ներկա անկախ Հայաստանի խորհրդանիշներին: Ի դեպ, նույնը վերաբերում է նաև Երևանի Հաղթանակի այգու հուշարձաններին: Մայր Հայաստան ասելով մենք այսօր պետք է որ առաջին հերթին հասկանանք ու պատկերացնենք 1918-ի Սարդարապատի, Բաշ-Ապարանի, Ղարաքիլիսայի և նույն Գյումրիից ոչ հեռու գտնվող Սառնաղբյուրի մայիսյան հերոսամարտերը, որը հայ ժողովրդի իրական Հայրենական Մեծ պատերազմն էր՝ մղված իր հայրենիքի ազատության և Անկախ Հայաստանի կերտման համար: Կարծում եմ՝ բնավ էլ դժվար չէր այս 30 տարիների ընթացքում 2-րդ աշխարհամարտի մասը կազմած սովետա-գերմանական պատերազմի տարեթվերին ավելացվեին նաև 1-ին աշխարհամարտում մեր փառահեղ հաղթանակները և Հայաստանի վերոնշված հերոս-բնակավայրերի անունները: Սա ուղղակի արդեն զավեշտալի ստրկամտություն է՝ 30 տարվա անկախությունից հետո Մայր Հայաստանը դեռևս նույնականացվում է մահկանացուն կնքած ԽՍՀՄ-ի հետ»: |