Կառավարության նիստի ժամանակ վարչապետը հայտարարեց, որ 2018-ից հետո բենզինի ու դիզվառելիքի շուկայում էական փոփոխություններ են տեղի ունեցել, բայց դա չի նշանակում, որ խնդիրը լուծված է։ Փաշինյանն անդրադարձավ նաև բենզինի որակի ու քանակի հարցին․ «Երբ քաղաքացին վճարում է՝ 5 լիտր պրեմիում տեսակի բենզին լիցքավորելու համար, պետությունը պետք է երաշխավորի, որ այդ 5 լիտրն իրոք 5 լիտր է, պրեմիումն իրոք պրեմիում է»։ Կառավարության նիստում հավանության արժանացավ նաև «Հայաստանի Հանրապետության Կառավարության և Ղազախստանի Հանրապետության Կառավարության միջև Հայաստանի Հանրապետություն նավթամթերքի մատակարարումների բնագավառում առևտրատնտեսական համագործակցության մասին» համաձայնագրի կնքման առաջարկությունը։ Ըստ փոխվարչապետի՝ համաձայնագրի ստորագրումից և վավերացումից հետո հնարավոր կլինի ղազախական վառելիքն ավելի լավ պայմաններով ներկրել Հայաստան, որը ենթադրում է, որ մեր վառելիքի շուկայում մրցակցության հնարավորություն կստեղծվի։
|