Mamul.am
Ամբողջական տարբերակ Մամուլի խոսնակ
USD 484.83, EUR 571.91, RUB 6.61, GBP 634.16
+21 °C, +17 °C ... +29 °C Վաղը`+28 °C
Hay / Հայ | Рус | Eng | Tür
«Իրավունք ունեմ նրան ու նրա նմաններին ասելու՝ դուք մի կտոր լափի համար լքել եք ձեր հայրենիքը». Նաիրա Զոհրաբյան
22:00, 06.07.2020

ԱԺ «Բարգավաճ Հայաստան» խմբակցության պատգամավոր Նաիրա Զոհրաբյանը ֆեյսբուքյան իր էջում գրել է․ «Սիրելի՛ հայրենակիցներ,

Ինչպես և գիտեինք ու սպասում էինք, իշխանությունը հատեց օրենքի և բարոյականության բոլոր հնարավոր կարմիր գծերը։ Ես չեմ խոսելու իրենց մասին ու իրենց հետ։ Ես դիմում եմ ձեզ՝ Հայաստանում և Սփյուռքում ապրող իմ հայրենակիցներին։
Թույլ միʹ տվեք, որ իրենց իշխանությունը պահելու համար օգտագործեն ձեր՝ շատ հաճախ, այո, արդարացի ցասումն ու ընդվզումը։
Մի՛ հայհոյեք, մի՛ հայհոյեք ո՛չ իշխանությանը, ո՛չ ընդդիմությանը, մի՛ դարձեք իշխանության ֆեյք, որ ձեզնով պատսպարված՝ շարունակեն հասարակությանը բաժանել յուրայինների և օտարների, որ ձեզ սարքած վահան՝ շարունակեն անտեսել երկրի ահագնացող տնտեսական և սոցիալական ճգնաժամը, որ ձեզ սարքելով վահան ու թիրախ՝ փախչեն կորոնավիրուսի դեմ տապալված պայքարի շատ մոտալուտ պատասխանատվությունից։ Երբ իշխանությունը, չունենալով քաղաքական հակափաստարկներ, սկսում է ընդդիմության հետ խոսել կոմպրոմատների և մեր անձնական, մասնավոր օգտահաշիվներն ու հեռախոսազրույցներն անթաքույց հրապարակելու գործիքով՝ թքած ունենալով մարդու իրավունքի և քաղաքացու անձնական կյանքի անձեռնմխելիության վրա, սա մեկ բան է նշանակում՝ այս իշխանությունն այլևս պարտված է։
Երբ, չունենալով քաղաքական հակափաստարկներ, իշխանությունը տարբեր ֆեյք ու ֆեյքատիպ օգտատերերի միջոցով փորձում է մեզ սադրանքների ենթարկել, որ հետո դրանք հանրայնացնի, սա մեկ բան է նշանակում՝ այս իշխանությունն արդեն պարտված է։

Սիրելի՛ հայրենակիցներ, թույլ մի՛ տվեք, որ ձեզ դարձնեն գործիք՝ ընդդիմախոսների հետ իրենց անբարո պայքարում։
Երբ ինձ անձնական նամակով ամենալկտի սեռական հայհոյանք է գրում Ստրասբուրգ փախած և էնտեղ ապաստան խնդրած մի կին, ով Ստրասբուրգի խանութից օծանելիք էր գողանում ու կես գնով առաջարկում էր հայկական պատվիրակության անդամներին և մերժում ստանալով՝ սկսում է հայհոյել, ես, այո՛, իրավունք ունեմ նրան ու նրա նմաններին ասելու՝ «դուք մի կտոր լափի համար լքել եք ձեր հայրենիքն ու հիմա էլ էնտեղից եք ապականում Հայաստանը»։
Ես խոնարհվում եմ Հայաստանում և Սփյուռքում ապրող իմ բոլոր այն հայրենակիցների առաջ, ովքեր, ունենալով տարբեր քաղաքական հայացքներ, երբեք չեն հայհոյել, թշնամանք ու ատելություն չեն գեներացրել։
Մի՛ արեք, պարզապես մի՛ արեք։
Սրանք մտել են մեր ընտանիքները, եղբորը հանել են եղբոր դեմ, որդուն՝ հոր դեմ, հարազատին՝ հարազատի դեմ, սրանք ոտնահարել են մարդու հնարավոր բոլոր իրավունքներն ու սրանք պատասխան են տալու։
Ջուր մի՛ լցրեք ատելության ու թշնամանքի սրանց ջրաղացին, որի միակ նպատակը երկրի խայտառակ ձախողումներից ուշադրությունը շեղելու համար քաղաքական ընդդիմախոսներին հետապնդելն է։
Սրանք շատ լուրջ հանցագործություններ են, որոնց համար շատ մոտ ապագայում բոլոր դերակատարներն ու հիմնական կազմակերպիչը պատասխան են տալու։ Մերժե՛ք ատելությունն ու թշնամանքը, մերժե՛ք հայհոյանքն ու հասարակությունը պառակտելու սրանց բոլոր քայլերը։ Մենք, իսկապես, հայրենիք ենք կորցում։
Դրա համար շատ բան պետք չէ՝ պետք է ընդամենը՝ չհայհոյել ու ատելություն չսփռել։
Դուք կարող եք չսիրել ինձ, կարող եք չսիրել իմ կուսակցությունը, կարող եք անգամ ատել ինձ կամ որևէ այլ գործչի, բայց դուք իրավունք չունեք հայհոյելու ինձ ու իմ երեխային, դուք իրավունք չունեք հայհոյելու ընդդիմության կամ իշխանության որևէ ներկայացուցչի, որովհետև հայհոյանքը արդեն ամենամեծ պարտությունն է։ Հայհոյանքը պարտվածի ու ոչնչության զենքն է։ Ողորմելի զենքը՝ ի սկզբանե դատապարտված պատերազմում։
Մի՛ համաձայնեք ինձ հետ, մի՛ համաձայնեք իմ գործընկերների, կամ ընդդիմադիր մյուս գործիչների հետ, բայց մի՛ հայհոյեք, ատելություն ու թշնամանք մի՛ տարածեք, որովհետև էդպես պարտվում եք դուք ու էդպես պարտվում ենք բոլորս։

Ես պատրաստ եմ ու բաց ճակատով դիմակայելու եմ այս իշխանության բոլոր անբարո քայլերին, որ դեռ լինելու են։ Ինձ լռեցնել հնարավոր չէ։
Բայց նաև, երբ օրը գա, ես պաշտպանելու եմ և չեմ թողնելու, որ սրանց հետ հաշվեհարդար տեսնեն, շատ դաժան հաշվեհարդար բոլոր նրանք, ում ընտանիք սրանք մտել են։
Այո՛, չեմ թողնելու, որովհետև բոլորս պիտի գնանք բացառապես իրավական ճանապարհով ու բոլորս ենք ներկա լինելու սրանց Նյուրենբերգին։

Առողջ եղեք ու միշտ ժպտացեք»:

Տեղեկացրե՛ք Ձեր մտերիմներին
| |
դեպի վեր