«Հանրապետություն» կուսակցության նախագահ Արամ Սարգսյանը ֆեյսբուքյան իր էջում գրել է. «Ու զարմանում եմ, որ դեռ նման հարց կա... Կրե՞լ դիմակ, թե՞ ոչ։ Դիմակն ամբողջությամբ չի պաշտպանում, բայց 30% նվազեցնում է վարակվելու հավանականությունը։ Պետությունն օրենք է ընդունել պատադիր դիմակ կրելու մասին և ճիշտ է արել, որովհետև խնդիրը վերաբերում է մարդկային կյանքերին։ Կան մարդիկ, ովքեր հասկանում և ենթարկվում են դիմակ կրելու պետական պարտադրանքին՝ փորձելով հնարավորինս անվտանգ պահել իրենց և շրջապատող անձանց առողջությունը։ Կա մարդկային մի տեսակ էլ, ով կասկածում և հակադրվում է ցանկացած որոշման, առավել ևս, որ դա իր կողմից չսիրված իշխանությունը կամ անհատն է առաջարկում, և ցուցադրական կամ կեղծ պատրվակներով ու բացատրություններով դիմակ չի կրում՝ վտանգելով իր և իր շրջապատի անձանց առողջությունը։ Հիմա պետությունն ում պետք է պաշտպանի՝ օրինապաշտի՞ն, թե՞ անօրենին, և եթե գտնում եք, որ օրինապաշտին, ապա ինչպե՞ս... Ազատազրկելն անհամաչափ է և, իմ կարծիքով, շատ խիստ: Մնում է վարչական տուգանքը, իսկ հետևություն չանելու դեպքում` դրա բարձրացումը։ Տուգանքները շատ բարձր են ու եռօրյա ժամկետում պարտադիր գանձվել են, թե՛ Վրաստանում, և թե՛ մարդկային կարգապահությամբ լավ օրինակ հանդիսացող Գերմանիայում։ Այլ տարբերակ դիմակ կրելու մասով աշխարհում չի կիրառվել, իսկ տուգանքից եկած գումարը, իմ կարծիքով, ամբողջությամբ պետք է ուղղել բժիշկներին` որպես հավելավճար, քանի որ նրանք են կրում օրենքը չհարգող մարդկանց անպատասխանատու պահվածքի ամբողջ ծանրությունը»։ |