Բելառուսում բողոքի ակցիաները կարող են տևել մի քանի ամիս, դրանց տևողությունը կախված կլինի նրանից, թե որքան ուժեղ են բելառուսները տրամադրված պայքարի շարունակման հարցում, և արդյոք նրանք ինչ-որ արտաքին աջակցություն կունենան, հայտարարել է ՌԴ Նախագահին առընթեր ազգամիջյան հարաբերությունների խորհրդի անդամ Բոգդան Բեզպալկոն:
«Բողոքները կշարունակվեն, քանի որ Բելառուսում աննախադեպ հասարակական-քաղաքական ակտիվություն է արթնացել։ Մարդիկ հոգնել են նախագահ Ալեքսանդր Լուկաշենկոյից, և նրանք քվեարկում են հենց նրա դեմ, ուզում են, որ նա հեռանա: Իսկ Լուկաշենկոն, բնականաբար, ցանկանում է մնալ։ Հետագա իրավիճակը կախված է նրանից, թե որքան ուժեղ են բելառուսները տրամադրված պայքարի շարունակմանը և արդյոք նրանք ինչ-որ արտաքին աջակցություն կունենան՝ Ռուսաստանի կամ Արևմուտքի կողմից։ Եթե դա լինի, ապա այդ դիմադրությունը կարող է շատ երկար տևել, քանի որ մենք տեսնում ենք, որ այժմ Բելառուսում բազմահազարանոց ցույցեր են ընթանում։ Արդեն մի քանի հազար մարդ է ձերբակալվել, այդ թվում՝ լրագրողներ»,- ասել է փորձագետը։
Նրա կանխատեսումներով՝ բողոքները կարող են շարունակվել մինչև մի քանի ամիս․ «Մի քանի օրից մինչև մի քանի ամիս։ Իհարկե, դրանք ճնշվելու են ուժով, այնպես, ինչպես հիմա»,- հստակեցրել է Բեզպալկոն։
Հիշեցնենք, որ նախագահական ընտրություններից հետո, Բելառուսի մի շարք քաղաքներում բողոքի զանգվածային չարտոնված ակցիաներ են տեղի ունեցել։ Մինսկի կենտրոնում ցուցարարներն աղբամաններից բարիկադներ են կառուցել։ Ոստիկանությունը նրանց դեմ արցունքաբեր գազ, ջրցան մեքենաներ և լուսաձայնային նռնակներ է կիրառել։