Դաշնակահարուհի Էլեն Սահակյանը մի քանի օր առաջ հրթիռակոծության ձայների ներքո Արցախում բացօթյա կատարել է Կոմիտասի գործերից մեկը՝ «Գարուն ա» ստեղծագործությունը։ Տեսահոլովակն արդեն հասանելի է «Ինստագրադ»-ի յութուբյան տեսադարանում, նպատակն է դիտումներից հավաքված գումարը փոխանցել «Հայաստան» համահայկական հիմնադրամին։ «Հայկական ժամանակը» Էլեն Սահակյանի հետ զրույցել է արտակարգ իրավիճակում տեսահոլովակ նկարահանելու և այլ մանրամասների շուրջ։ Դաշնակահարուհին անկեղծացավ, որ աշխատանքներն ավարտին հասցնելը շատ բարդ է եղել, կազմակերպվելն ու Արցախ հասնելն՝ առավելևս։ Վերջինս անկեղծացավ, որ սահմանն անցնելու պահից վախը իր մեջ էր, լսում էր ռմբակոծությունների ձայներն ու ամեն վայրկյան սպասում երկնքում ԱԹՍ-ի հայտնվելուն․ «Բայց ցանկությունս և նպատակս այնքան մեծ էին, որ ինձ ուժ էին տալիս իրականացնելու այն մտահղացումը, ինչի համար գնացել էի Արցախ։ Հավատացնում եմ ձեզ՝ Արցախում գտնվելուց մի քանի ժամ հետո և առավելևս նվագելու ընթացքում ի մեջից վախը կորել էր։ Լսում էի ռմբակոծությունների ձայները, բայց միտքս սահմանում կանգնած զինվորների հետ էր»: Դաշնակահարուհու խոսքով՝ նպատակն էր ամբողջ աշխարհին ցույց տալ, թե ինչպիսի բարբարոս և անմարդկային թշնամի ունենք․ ռմբակոծում են խաղաղ բնակավայրերը, հայկական մշակութային կոթողներն ու եկեղեցիները։ Հայ երաժշտի լուսնակարներն ու տեսանյութը տարածվել էին համաշխարհային ամենահեղինակավոր լրատվամիջոցներով։ |