Կառավարության շենքի մոտ գտնվող անհետ կորած զինծառայողների ծնողները և հարազատներն այսօր կրկին կհանդիպեն վարչապետի հետ։ Այս մասին լրագրողների հետ զրույցում ասաց ծնողներից մեկը։ «Սպասում ենք հանդիպմանը, ուղղակի ծնողներով որոշում ենք՝ ովքերով ենք մտնելու ներս»,- ասաց նա՝ հավելելով, որ ակնկալում են ստանալ նախորդ օրը բարձրացրած հարցերի պատասխանները։ «Ցուցակագրվել են մոտ 50 ծնող, բայց ուզում ենք քչով մտնենք, որ հարցերն ավելի հստակ բարձրացնենք»,- ասաց ծնողը՝ միաժամանակ նշելով, որ իրենք կողմ չեն ամենօրյա հանդիպումներին։ Նրա խոսքով՝ կարելի էր մեկ արդյունավետ հանդիպում կազմակերպել, ոչ թե մի քանի, որտեղ միայն խոստումներ կհնչեն։ |