«Ինչ տեղի ունեցավ այս խորհրդի նիստում, նույնիսկ սյուրռեալիզմ չէր, աբսուրդի վերջին գագաթն էր։ Սա անկհայտ քաղաքական հաշվեհարդար է»,- ԱԺ խորհրդի նիստի ավարտից հետո լրագրողների հետ զրույցում ասել է ԲՀԿ պատգամավոր Նաիրա Զոհրաբյանը՝ հավելելով, որ չկա որևէ հիմնավորում, որ «Բարգավաճ Հայաստան» խմբակցության ղեկավար Գագիկ Ծառուկյանը զբաղվել է ձեռնարկատիրական գործունեությամբ։ Պատգամավորի խոսքով՝ Ծառուկյանին մանդատից զրկելու վերաբերյալ միջնորդությունը կուղարկվի Սահմանադրական դատարան և 30-օրյա ժամկետում կորոշվի՝ արդյոք բերված փաստարկները հիմնավո՞ր են, և արդյոք Ծառուկյանը պետք է զրկվի մանդատից, թե ոչ: Հիշեցնենք՝ ԲՀԿ ղեկավար Գագիկ Ծառուկյանին պատգամավորական մանդատից զրկելու հարցով Սահմանադրական դատարան դիմելու համար Ազգային ժողովի խորհուրդն այսօր նիստ էր գումարել: |