Էջմիածնի զորամասի անհետ կորած 34 զինծառայողների ծնողները դիմում-նամակը փոխանցեցին ՀՀ-ում ՌԴ արտակարգ և լիզոր դեսպան Սերգեյ Կոպիրկինին՝ խնդրելով, որ ռուսական կողմը՝ Վ. Պուտինի գլխավորությամբ, քայլեր ձեռնարկի իրենց որդիներին վերադարձնելու համար: Ծնողները դեսպանին հայտնեցին, որ տեղեկություններ ունեն, որ իրենց որդիների մի մասը, ամենայն հավանականությամբ ողջ է, կան նաև գեր ընկածներ, և ամեն րոպեն կարևոր է, պետք է շտապել, քանի որ տևական ժամանակ նրանք անտառներում են՝ առանց սնունդի, տաք հագուստի, իսկ եղանակներն արդեն ցրտում են. «Ամեն մի վայրկյանը կարևոր է, խոսքը մարդկային կյանքերի մասին է»,- ասացին ծնողները: Կոպիրկինը հայտնեց, որ իրենք քայլեր կձեռնարկեն՝ խնդրին լուծում գտնելու համար. «Մենք բոլոր ջանքերը կգործադրենք. կիսում ենք ձեր ցավը»,- ասաց դեսպանը: Այժմ ծնողները պատրաստվում են գնալ Պաշտպանության նախարարություն՝ շարունակելու իրենց բողոքի ակցիան: |