ԱԺ պատգամավոր Արման Բաբաջանյանը ֆեյսբուքյան իր էջում գրել է. «Վերջին օրերին հանրային-քաղաքական օրակարգի մաս են դարձել Հայաստանյայց Առաքելական Սուրբ եկեղեցին, Ամենայն Հայոց Կաթողիկոսը, երկփեղկված հայ հանրության տրամադրությունները եկեղեցու և հոգևորականության նկատմամբ։ Հարցն ինքնին շատ զգայուն է, առավելևս, երբ քննարկվում է մեր ժողովրդի համար ճակատագրական այս ժամանակաշրջանում։
Մեր ժողովրդին և պետությանը պատուհասած արհավիրքին դիմակայելու համար մեզ առավել քան երբևէ անհրաժեշտ է միասնականություն ու համախմբվածություն, միասնականություն առաջին հերթին պետության, բայց նաև եկեղեցու, հանրային ու պետական կյանքի բոլոր կարևոր ինստիտուտների շուրջ։
Հատկապես այս օրերին անթույլատրելի է հանրային պառակտվածությունն ու երկփեղկվածությունը խորացնող որևէ դրսևորում, կրկնում եմ, անկախ այն հանգամանքից, դա ծնող պատճառները հիմնավոր են, թե ոչ։
ՍԵՐ, ՀԱՆԴՈՒՐԺՈՂԱԿԱՆՈՒԹՅՈՒՆ, ԿԱՐԵԿՑԱՆՔ, ՀՈԳԱՏԱՐՈՒԹՅՈՒՆ․․․ այս և մարդկային ամենավեհ այլ արժեքներն այսօր պահանջված ու անհրաժեշտ են ամենայնից առաջ ու ամենայնից վեր։
Հանրային ու պետական կյանքը պառակտող բոլոր բանավեճերն ու քննարկումները, որոնք գոյության իրավունք ունեն, կարող են և պետք է ծավալվեն այս համազգային ու համապետական ճգնաժամի հաղթահարումից հետո, ավելի լավ ու ավելի նորոգ ժամանակներում։ Իսկ մինչև այդ մենք՝ որպես հասարակություն և անհատապես պետք է անենք մեզանից կախված առավելագույնն աշխարհիկ ու հոգևոր իշխանությունների շուրջ համախմբվելու, համազգային համերաշխություն ու միասնականություն ցուցաբերելու համար։
Սա չափազանց կարևոր է 2020թ․ տարեմուտի այս օրերին՝ մեր նորանկախ պետության 30-ամյակին ընդառաջ, որը հավուր պատշաճի նշելու համար պետք է լինենք միակամ ու միահամուռ՝ պետությամբ, Հայաստանյայց սուրբ եկեղեցով ու հասարակությամբ՝ ի պետս Հայաստանի Հանրապետության, ի պետս աշխարհասփյուռ հայ ժողովրդի և ի հիշատակ Հայաստանի և Արցախ աշխարհի գոյության համար իրենց կյանքը նվիրաբերած հազարավոր հայորդիների»։