«Ինձ համար զարմանալի կերպով առնվազն խորհրդարանական ընդդիմության ներկայացուցիչները մերժում են արտահերթ ընտրությունների առաջարկը և, հետևաբար, իշխող ուժի համար այդքան էլ տրամաբանական չի, որ իշխող ուժն ինքը իր համար անի ընտրություններ»,- այսօր ԱԺ-ում հարցուպատասխանի ժամանակ հայտարարեց ՀՀ վարչապետ Նիկոլ Փաշինյանը:

Ըստ նրա՝ ընդդիմության նման դիրքորոշումը նշանակում է՝ վերջիններն արձանագրում են իրենց պարտությունը արտահերթ խորհրդարանական ընտրություններում:
«Այն պայմաններում, երբ ընդդիմությունն ասում է ոչ մի կերպ ոչ մի արտահերթ ընտրություն, անտրամաբանական է, որ իշխող մեծամասնությունը պետք է ասի՝ չէ որ չէ՝ պետք է լինեն ընտրություններ», - ասաց Փաշինյանը։

Անկախ պատգամավոր Տիգրան Ուրիխանյանը հետարքրքվեց՝ «Ի վերջո, կտա՞ք հրաժարական», ինչին ի պատասխան Փաշինյանն ասաց. «Իշխանությունը պատկանում է ժողովրդին ու իշխանության վերաբերյալ որոշումները պետք է կայացնի ժողովուրդը, մենք չենք անի այնպիսի քայլ, որը ժողովրդին կզրկի իշխանության վերաբերյալ որոշումներ կայացնելու հնարավորությունից ու լծակներից և իշխանության հարցը կտեղափոխի փակ սենյակներում քննարկումների տրամաբանություն»։