Իտալիայում՝ Ջենովայի արվարձաններից մեկում՝ Կամոլիում գտնվող գերեզմանատան մի մասը սողանքի պատճառով ծովում է հայտնվել։ Տեղական ԶԼՄ-ների հաղորդմամբ՝ հանգուցյալների հետ միասին 200-ից ավելի դագաղ է ջրի մեջ հայտնվել:

Ջրի մակերևույթի և ժայռի եզրի միջև բարձրությունը՝ դատելով հրշեջների լուսանկարներից, մի քանի տասնյակ մետր է: Փլուզումը կարող է պայմանավորված լինել հողի էրոզիայով, որը վերջին տարիներին խորացել է ուժեղ մակընթացային ալիքների պատճառով:
Ինչպես հաղորդում է la Stampa թերթը՝ սողանքի ժամանակ գերեզմանատանը գտնվող մի խումբ աշխատողների հաջողվել է փրկվել: Հողի զանգվածների տեղաշարժից տուժել է նաև 2 մատուռ։
Դեպքը տեղի է ունեցել երկուշաբթի օրը։ Դեպքի վայր են ժամանել հրշեջները, ոստիկանությունը և առափնյա պահպանության աշխատակիցները։
Նրանք ստորջրյա պատնեշներ են տեղադրել, որպեսզի դագաղները չհեռանան ափից, և սկսել են դրանք բարձրացնել գերեզմանատան տարածք: