Բելառուսի նախագահ Ալեքսանդր Լուկաշենկոն ապրիլի 13-ին կայցելի Ադրբեջան, հայտնում է БЕЛТА-ն: Ալեքսանդր Լուկաշենկոն և Իլհամ Ալիևը 2 հանդիպում կանցկացնեն։ Դրանցից մեկը տեղի կունենա Բելառուսի նախագահի՝ Բաքու ժամանելուն պես: Բանակցությունների պաշտոնական մասը նախատեսված է չորեքշաբթի: Նախագահների հանդիպումը տեղի կունենա նեղ և ընդլայնված կազմով՝ պատվիրակությունների անդամների մասնակցությամբ: Հիմնական ուշադրությունը կհատկացվի առևտրատնտեսական փոխգործակցության ընդլայնմանը։ Անդրադարձ է կատարվելու նաև առողջապահության, գիտատեխնիկական, կրթական և զբոսաշրջային ոլորտներում համագործակցությանը։ Բանակցությունների արդյունքում սպասվում է երկկողմ փաստաթղթերի ստորագրում: |