«Լուսավոր Հայաստան» խմբակցության պատգամավոր Աննա Կոստանյանը ֆեյսբուքյան իր էջում գրել է. «Ադրբեջանի կողմից «վերականգնման» անվան տակ ապամոնտաժվում և ոչնչացվում է հայկական մշակութային արժեքներից մեկը՝ օկուպացված Շուշիի Սուրբ Ղազանչեցոց տաճարը։ Մի ազգ, որի դեմ Ադրբեջանը տասնամյակներ շարունակ ամենաբարձր պետական մակարդակով ատելություն է տարածում, չի կարող վերականգնել նրա մշակութային արժեքները: Նպատակը շատ պարզ է՝ ջնջել հայկական ներկայությունն ու հետքը այս տարածաշրջանում: Արցախում հայկական քրիստոնեական մշակույթն այլոց վերագրելու որդեգրած քաղաքականությունը բազմիցս քննադատության է ենթարկվել պատմաբանների և մշակութաբանների կողմից։ Սա է պատճառը նաև, որ Ադրբեջանը մինչ օրս թույլ չի տալիս ՅՈՒՆԵՍԿՕ-ի անկախ փորձագիտական խմբին այցելել տարածաշրջան՝ հայկական մշակութային արժեքների դեմ ամենօրյա վանդալիզմը կանխարգելելու նպատակով: Ավաղ, այս հարցը մնում է քննադատության և կոչերի մակարդակում, մինչդեռ միջազգային մակարդակում գործնական քայլեր գրեթե չեն արվում կամ առնվազն տեսանելի չեն, այլապես ինչո՞ւ է ադրբեջանական այս կործանարար գործունեությունը շարունակվում: Կոչ եմ անում ՅՈՒՆԵՍԿՕ-ի «Զինված բախումների ժամանակ մշակութային արժեքների պաշտպանության կոմիտեին», Հուշարձանների և տեսարժան վայրերի միջազգային խորհրդին (ICOMOS), Կապույտ վահան միջազգային կազմակերպությանը, որոնց նպատակն է հակամարտության գոտում գտնվող ժառանգության պահպանությունը, ձեռնարկել բոլոր անհրաժեշտ միջոցները՝ հայկական մշակութային արժեքները փրկելու համար: |