«Որոշ հատվածներում հակառակորդը տեղակայման պրոցես չէր կատարել։ Հիմա եղանակային պայմանները փոխվել են, տեղակայման պրոցես են իրականացնում, մեր ԶՈՒ-ն էլ հետևում է, որ հակառակորդն իր տեղակայման վայրերից հանկարծ առաջ չգա․ ռելիեֆն այնտեղ բարդ է, հեշտ չէ կողմնորոշվել սահմանագծի հարցում»,- այսօր՝ լրագրողների հետ զրույցում, Գեղարքունիքում իրավիճակը ներկայացնելիս ասաց մարզպետ Գնել Սանոսյանը։

Հարցին, թե արդյոք նույն իրավիճակն է այնտեղ, ինչ Սյունիքում, Գեղարքունիքի մարզպետը ժխտեց՝ նշելով, որ միայն մեկ-երկու տեղ լանջով սահմանագիծ կար, որը հայկական կողմը պնդել է, որ հակառակորդը հետ պիտի տեղակայվի։

«Ընթացքում դա կարգավորեցինք, հետ նստեցին, բացարձակապես լարվածություն չկա»,- հավելեց Սանոսյանը։

«Ես երեկ մի քանի ժամ եղել եմ Վերին Շորժայում և հենց այն հատվածում, որտեղ աշխատանքներն են ընթանում, մեր ԶՈՒ-ն ներկա է, աշխատում են, քարտեզները կան»,- ընդգծեց մարզպետը։

«Ուղղակի բանակցում են իրար հետ, սահմանագիծը ճշգրտում»,- նշեց նա։